اسلام آباد ہائی کورٹ کے چیف جسٹس عامر فاروق نے ایک اہم فیصلہ کرتے ہوئے دیگر صوبوں سے تین نئے ججز کی شمولیت کے بعد سینیارٹی لسٹ میں رد و بدل کر دیا، جس کے نتیجے میں جسٹس سرفراز ڈوگر سینئر پیونی جج مقرر ہو گئے۔
تفصیلات کے مطابق، اس تبدیلی کے بعد جسٹس محسن اختر کیانی سینیارٹی لسٹ میں دوسرے نمبر پر چلے گئے، جب کہ جسٹس میاں گل حسن اورنگزیب تیسرے، جسٹس طارق محمود جہانگیری چوتھے، جسٹس بابر ستار پانچویں اور جسٹس سردار اسحاق خان چھٹے نمبر پر آ گئے۔ اسی طرح جسٹس ارباب محمد طاہر ساتویں، جسٹس ثمن رفعت امتیاز آٹھویں، جسٹس خادم حسین نویں، جسٹس اعظم خان دسویں، جسٹس آصف گیارہویں اور جسٹس انعام امین منہاس بارہویں نمبر پر آ گئے۔
دیگر صوبوں سے تین ججز کی شمولیت کے بعد اسلام آباد ہائی کورٹ کی انتظامی کمیٹی میں بھی تبدیلیاں کر دی گئی ہیں۔ نئے فیصلے کے مطابق، چیف جسٹس عامر فاروق کو انتظامی کمیٹی کا چیئرمین مقرر کیا گیا ہے، جبکہ جسٹس سرفراز ڈوگر اور جسٹس خادم حسین سومرو کو کمیٹی کے ممبران نامزد کر دیا گیا ہے۔ چیف جسٹس کی منظوری کے بعد ایڈیشنل رجسٹرار نے اس سلسلے میں نوٹی فکیشن جاری کر دیا۔
چیف جسٹس عامر فاروق نے اسلام آباد ہائی کورٹ کی ڈیپارٹمنٹل پروموشن کمیٹی میں بھی رد و بدل کر دیا ہے۔ نئی کمیٹی سینئر پیونی جج جسٹس سرفراز ڈوگر اور جسٹس اعظم خان پر مشتمل ہو گی۔ اس فیصلے کی منظوری کے بعد ایڈیشنل رجسٹرار اعجاز احمد نے باضابطہ نوٹی فکیشن جاری کر دیا ہے۔
