لاہور: لاہور ہائی کورٹ میں 9 نئے ایڈیشنل ججز نے اپنے عہدوں کا حلف اٹھا لیا۔ حلف برداری کی تقریب سادہ مگر پروقار انداز میں لاہور ہائی کورٹ کے مرکزی سبزہ زار میں منعقد ہوئی۔
تقریب میں چیف جسٹس لاہور ہائی کورٹ جسٹس عالیہ نیلم نے نو تعینات شدہ ایڈیشنل ججز سے حلف لیا، جبکہ رجسٹرار لاہور ہائی کورٹ عبہر گل خان نے نظامت کے فرائض انجام دیے۔
تقریب میں سینئر ترین جج جسٹس شجاعت علی خان، جسٹس علی باقر نجفی، لاہور ہائی کورٹ کے دیگر افسران، صوبائی و وفاقی لاء افسران، سینئر وکلاء اور ججز کے اہل خانہ بھی شریک تھے۔
حلف اٹھانے والے ججز میں جسٹس حسن نواز مخدوم، جسٹس ملک وقار حیدر اعوان، جسٹس سردار اکبر علی، جسٹس سید احسن رضا کاظمی، جسٹس ملک جاوید اقبال وینس، جسٹس محمد جواد ظفر، جسٹس خالد اسحاق، جسٹس ملک محمد اویس خالد اور جسٹس چودھری سلطان محمود شامل ہیں۔
یہ تقریب اعلیٰ عدلیہ کے وقار اور انصاف کی عملداری کو مزید مستحکم کرنے کے عزم کا اظہار تھی، جہاں نو تعینات ججز نے آئین اور قانون کی پاسداری کا حلف اٹھایا۔
