مشہور بالی ووڈ اداکارہ ودیا بالن سوشل میڈیا پر گردش کرنے والی اپنی جعلی AI ویڈیوز پر سخت برہم ہو گئیں۔ انہوں نے واضح کیا کہ ان ویڈیوز کا ان سے کوئی تعلق نہیں اور وہ ان کے خیالات یا کام کی نمائندگی نہیں کرتیں۔ ودیا بالن نے مداحوں سے درخواست کی کہ کسی بھی ویڈیو کو شیئر کرنے سے پہلے اس کی تصدیق ضرور کریں۔
بالی ووڈ کی معروف اداکارہ ودیا بالن نے سوشل میڈیا پر وائرل ہونے والی اپنی جعلی AI ویڈیوز پر سخت ردعمل دیا ہے۔
انہوں نے انسٹاگرام پر ایک بیان جاری کرتے ہوئے کہا کہ ان ویڈیوز کو دیکھ کر ایسا لگتا ہے جیسے وہ ان سے متعلق ہیں، لیکن حقیقت میں یہ AI ٹیکنالوجی سے بنائی گئی جعلی ویڈیوز ہیں۔
"میری ان ویڈیوز کے بنانے یا پھیلانے میں کوئی شمولیت نہیں ہے، اور میں ان کے مواد کی حمایت نہیں کرتی۔ ان ویڈیوز میں جو کچھ کہا گیا ہے، وہ میرے خیالات کی عکاسی نہیں کرتا۔ میں سب سے درخواست کرتی ہوں کہ کسی بھی ویڈیو کو شیئر کرنے سے پہلے اس کی سچائی جانچیں اور گمراہ کن AI مواد سے ہوشیار رہیں۔”
یہ پہلا موقع نہیں ہے جب کسی بھارتی اداکار یا معروف شخصیت کو ڈیپ فیک ٹیکنالوجی کا نشانہ بنایا گیا ہو۔ اس سے پہلے رشمیکا مندنا، عالیہ بھٹ، دپیکا پڈوکون، کترینہ کیف، عامر خان، رنویر سنگھ اور سچن تندولکر بھی جعلی AI ویڈیوز کا شکار ہو چکے ہیں۔
ودیا بالن کو حال ہی میں رومانوی کامیڈی فلم "دو اور دو پیار” میں دیکھا گیا تھا، جس میں پرتیک گاندھی، الیانا ڈی کروز اور سندھیل راما مورتی بھی شامل تھے۔ فلم کو شائقین کی جانب سے اچھے ریویوز تو ملے، لیکن باکس آفس پر صرف 5.5 کروڑ روپے کا بزنس کر سکی۔
اس کے علاوہ، ودیا بالن نے "بھول بھلیاں 3” میں بھی کام کیا، جس میں کارتک آریان، مادھوری ڈکشٹ اور تریپتی ڈمری شامل تھے۔ یہ فلم دیوالی پر ریلیز ہوئی اور باکس آفس پر زبردست کامیابی حاصل کرنے میں کامیاب رہی۔
