امریکا نے کابل ایئرپورٹ دھماکے میں ملوث داعش کے دہشت گرد شریف اللہ کی گرفتاری میں تعاون پر پاکستان کا شکریہ ادا کیا ہے۔ امریکی محکمہ خارجہ کی ترجمان ٹیمی گروس نے کہا کہ دہشت گردی کے خلاف جنگ میں پاکستان امریکا کا اہم اتحادی ہے اور دونوں ممالک اس مشترکہ مقصد کے لیے متحد ہیں۔
غیر ملکی میڈیا کے مطابق، امریکی محکمہ خارجہ کی ترجمان ٹیمی گروس نے میڈیا بریفنگ کے دوران صحافیوں کو بتایا کہ داعش دہشت گرد شریف اللہ کی گرفتاری میں پاکستان کا کردار نمایاں ہے اور اس کا کریڈٹ پاکستان کو جاتا ہے۔
ترجمان نے مزید کہا کہ یہ گرفتاری اس بات کی عکاسی کرتی ہے کہ پاکستان اور امریکا دہشت گردی کے خلاف ایک ساتھ کھڑے ہیں اور دونوں ممالک کے درمیان تعلقات مضبوط اور اہم ہیں۔
ٹیمی گروس نے اس بات پر زور دیا کہ دہشت گردی کے خلاف جنگ میں پاکستان امریکا کا اتحادی ہے اور اس مشترکہ جدوجہد میں دونوں ممالک کا مفاد شامل ہے۔
واضح رہے کہ اس سے قبل امریکی قومی سلامتی کے مشیر مائیکل والٹر نے بھی شریف اللہ کی گرفتاری میں پاکستان کے تعاون کو سراہا تھا اور پاکستان کی کوششوں کی تعریف کی تھی۔
