دبئی :پاکستان کی متحدہ عرب امارات کیلئے رواں مالی سال کے دوران برآمدات میں 28 فیصد اضافہ ریکارڈ کیا گیا ہے۔ یہ اعلان دبئی میں پاکستانی کمرشل اور ٹریڈ قونصلر علی زیب نے کیا۔ وہ دبئی میں پاکستان قونصل خانے اور پاکستان بزنس کونسل کی جانب سے منعقدہ سحور محفل سے خطاب کر رہے تھے۔
علی زیب نے بتایا کہ جولائی 2024 سے فروری 2025 کے دوران پاکستان نے متحدہ عرب امارات کو 1.2 ارب ڈالرز کی برآمدات کیں، جو گزشتہ مالی سال کے اسی عرصے کے مقابلے میں 28 فیصد زیادہ ہیں۔
پاکستان ایسوسی ایشن دبئی میں منعقدہ اس سحور محفل کا مقصد دبئی چیمبر آف کامرس میں رجسٹرڈ دیگر ممالک کی بزنس کونسلز اور غیر ملکی سفارتکاروں کو پاکستان ٹریڈ شو میں شرکت کی دعوت دینا تھا۔
تقریب سے خطاب کرتے ہوئے پاکستان کے قونصل جنرل دبئی حسین محمد اور چیئرمین پاکستان بزنس کونسل دبئی شبیر مرچنٹ نے غیر ملکی مندوبین کو پاکستان میں سرمایہ کاری کی دعوت دی۔
پاکستان قونصل جنرل دبئی حسین محمد نے غیر ملکی مندوبین کو یقین دلایا کہ پاکستان میں ٹریڈ شو میں شرکت کے خواہشمند سرمایہ کاروں کو مکمل تعاون فراہم کیا جائے گا۔
چیئرمین پاکستان بزنس کونسل دبئی شبیر مرچنٹ نے بتایا کہ دبئی سے غیر ملکی سرمایہ کاروں کا ایک وفد لاہور میں منعقد ہونے والے میگا ٹریڈ شو میں شرکت کرے گا۔ یہ میگا ٹریڈ شو "ہیلتھ، انجینئرنگ اینڈ منرلز شو (ایچ ای ایم 2025)” کا چوتھا ایڈیشن ہے، جو 17 سے 19 اپریل 2025 تک لاہور میں منعقد ہوگا۔
