لاہور:پنجاب حکومت نے اسلحہ لائسنسز کی تصدیق کے عمل کو مزید مؤثر اور شفاف بنانے کے لیے بڑا قدم اٹھا لیا ہے۔ اب تمام اسلحہ لائسنسز کو نادرا کے ذریعے آن لائن ویری فکیشن کے نظام سے منسلک کیا جائے گا، جس کے تحت ہر لائسنس پر کیو آر کوڈ فراہم کیا جائے گا، تاکہ قانون نافذ کرنے والے ادارے بآسانی اس کی تصدیق کر سکیں۔
تفصیلات کے مطابق لاہور میں سیکرٹری داخلہ پنجاب کی زیرِ صدارت اسلحہ لائسنس کی تصدیق کے حوالے سے ایک اہم اجلاس منعقد ہوا، جس میں اسپیشل سیکرٹری داخلہ فضل الرحمن، ایڈیشنل سیکرٹری داخلہ (جوڈیشل) عمران حسین رانجھا اور نادرا حکام نے شرکت کی۔ اجلاس میں فیصلہ کیا گیا کہ نادرا کو ایک ہفتے کے اندر تمام اسلحہ لائسنسز کے ساتھ کیو آر کوڈ منسلک کرنے کا کام مکمل کرنا ہوگا، تاکہ یہ لائسنس متعلقہ شخص کے شناختی کارڈ سے منسلک ہو سکیں۔
پنجاب بھر کے کمشنرز اور ڈپٹی کمشنرز کو بھی ہدایت جاری کی گئی ہے کہ وہ تمام اسلحہ لائسنسز پر کیو آر کوڈ لگانے کے احکامات پر عمل درآمد یقینی بنائیں۔ اس جدید نظام کے ذریعے جعلی اسلحہ لائسنسز کا خاتمہ ممکن ہوسکے گا اور تصدیقی عمل میں شفافیت کو فروغ ملے گا۔
سیکرٹری داخلہ پنجاب نے اس موقع پر کہا کہ سنگین جرائم میں ملوث افراد کو اسلحہ لائسنس کے حصول کے لیے نااہل قرار دیا جائے گا۔ مزید برآں، آرمز رولز میں ایسی ترامیم کی جا رہی ہیں جو شہریوں کے لیے اس عمل کو آسان بنائیں گی، جبکہ انفرادی اور کاروباری اسلحہ لائسنس کے قوانین کو عام فہم بنانے کے اقدامات بھی جاری ہیں۔
انہوں نے مزید کہا کہ اسلحہ لائسنس کی تصدیق کے لیے ڈائریکٹوریٹ آف مانیٹرنگ کا کردار بڑھایا جا رہا ہے تاکہ پورے عمل کی کڑی نگرانی کی جا سکے۔ اس کے علاوہ، اسلحہ لائسنس کے حصول اور تجدید کے لیے فیسوں کے شیڈول میں بھی تبدیلی کی سفارش کی گئی ہے، تاکہ یہ عمل مزید سہل اور شفاف ہو سکے۔
