مسافروں سے بھرے طیارے میں اچانک آگ بھڑک اٹھی، خوفناک مناظر

نیویارک:امریکا کے ڈینور انٹرنیشنل ایئرپورٹ پر ایک سنسنی خیز واقعہ پیش آیا، جب امریکن ایئرلائنز کی پرواز کے انجن میں اچانک آگ بھڑک اٹھی۔ خوش قسمتی سے تمام مسافر بحفاظت نکال لیے گئے، تاہم 12 افراد معمولی زخمی ہوئے۔
تفصیلات کے مطابق جمعرات کی شام مقامی وقت کے مطابق 5:15 پر امریکن ایئرلائنز کی پرواز AA Flight 1006 کولوراڈو اسپرنگز سے ڈلاس جا رہی تھی کہ دورانِ پرواز طیارے کے انجن میں خرابی پیدا ہو گئی۔ اس پر طیارے کو فوری طور پر ڈینور ایئرپورٹ کی طرف موڑ دیا گیا۔
لینڈنگ کے بعد جب طیارہ گیٹ کی طرف بڑھ رہا تھا تو اچانک انجن میں آگ لگ گئی، جس کے باعث رن وے پر دھواں پھیل گیا۔ اس صورتحال میں مسافروں کو ہنگامی سلائیڈز، ونگ ایکزٹ اور جیٹ برج کے ذریعے فوری طور پر نکالا گیا۔ طیارے میں کل 172 مسافر اور 6 کریو ممبرز سوار تھے۔
ایئرپورٹ انتظامیہ کے مطابق تمام مسافر محفوظ رہے، تاہم 12 افراد کو معمولی چوٹیں آئیں، جنہیں اسپتال منتقل کر دیا گیا۔ فیڈرل ایوی ایشن اتھارٹی (FAA) نے واقعے کی تحقیقات شروع کر دی ہیں۔
امریکن ایئرلائنز نے اپنے بیان میں عملے، ایئرپورٹ ٹیم اور ریسکیو اداروں کے فوری ردِعمل کو سراہا ہے اور مسافروں کو ان کی منزل تک پہنچانے کے لیے متبادل طیارے کا بندوبست بھی کر دیا گیا ہے۔