اسلام آباد سے جعفر ایکسپریس حملے میں شہید ہونے والے 4 افراد کے جسد خاکی آبائی علاقوں کی جانب روانہ کر دیے گئے۔ اس حملے میں دہشت گردوں نے ریلوے ٹریک کو نشانہ بنا کر جعفر ایکسپریس کو روکا اور مسافروں کو یرغمال بنانے کی کوشش کی، تاہم سیکیورٹی فورسز نے جوابی کارروائی کرتے ہوئے تمام دہشت گردوں کو ہلاک کر دیا۔
جعفر ایکسپریس حملے میں شہید ہونے والوں میں محمد ممتاز کا تعلق مانسہرہ، روزے علی کا اسکردو، محمد عثمان کا اٹک اور محمد امتیاز کا تعلق سیالکوٹ سے تھا۔ ان کے جسد خاکی احترام کے ساتھ ان کے آبائی علاقوں کو روانہ کر دیے گئے۔
ڈی جی انٹر سروسز پبلک ریلیشنز (آئی ایس پی آر) لیفٹیننٹ جنرل احمد شریف کے مطابق، جعفر ایکسپریس پر حملہ کرنے والے اور مسافروں کو یرغمال بنانے کی کوشش کرنے والے تمام 33 دہشت گردوں کو سیکیورٹی فورسز نے ہلاک کر دیا۔ اس آپریشن میں ایف سی کے 4 جوان بھی شہید ہوئے۔
ڈی جی آئی ایس پی آر نے مزید بتایا کہ 11 مارچ کو بولان میں دہشت گردوں نے ریلوے ٹریک پر حملہ کر کے جعفر ایکسپریس کو روکنے کی کوشش کی۔ تاہم، سیکیورٹی فورسز نے فوری کارروائی کرتے ہوئے دہشت گردوں کے ناپاک عزائم کو ناکام بنا دیا۔
