لاہور:مصری اور اماراتی ماہرینِ فلکیات نے عیدالفطر 2025 کی تاریخ کے بارے میں اپنی پیشگوئیاں جاری کر دی ہیں، جن کے مطابق عید 30 یا 31 مارچ کو ہونے کا امکان ہے۔
تفصیلات کے مطابق عرب میڈیا کے مطابق مصر کے نیشنل انسٹی ٹیوٹ فار آسٹرونومیکل اینڈ جیو فزیکل ریسرچ نے پیشگوئی کی ہے کہ اس سال رمضان المبارک 29 دن کا ہوگا۔ ادارے کے مطابق آخری روزہ 29 مارچ بروز ہفتہ کو ہوگا، جبکہ عیدالفطر 30 مارچ بروز اتوار کو منائی جا سکتی ہے۔
مصری ماہرین کا کہنا ہے کہ دنیا کے تقریباً 30 شہروں میں 29 مارچ کو شوال کا چاند نظر آنے کے امکانات ہیں، جن میں مکہ مکرمہ، مدینہ منورہ، ریاض، انقرہ، تہران، مسقط، کراچی، لندن، ماسکو اور اوٹاوہ جیسے شہر شامل ہیں۔
دوسری جانب، اماراتی آسٹرونومی سوسائٹی کے چیئرمین ابراہیم الجروان نے بھی عید کی تاریخ کے بارے میں اپنی رائے دی ہے۔ ان کے مطابق عید 30 مارچ بروز اتوار یا 31 مارچ بروز پیر کو ہو سکتی ہے۔ انہوں نے وضاحت کی کہ 29 مارچ کو دوپہر 2 بج کر 58 منٹ پر (مقامی وقت کے مطابق) شوال کا چاند پیدا ہوگا، لیکن چونکہ سورج غروب ہونے تک چاند کی عمر صرف 3 گھنٹے ہوگی، اس لیے چاند دیکھنا مشکل ہو سکتا ہے۔ اگر چاند نظر نہ آیا تو عیدالفطر 31 مارچ بروز پیر کو منائی جائے گی۔
ماہرین کی یہ پیشگوئیاں چاند نظر آنے پر منحصر ہیں، اس لیے حتمی اعلان چاند دیکھنے والی کمیٹیاں کریں گی۔
