اسلام آباد:رواں برس یوم پاکستان پریڈ کو رمضان المبارک کے مقدس مہینے کے پیش نظر محدود پیمانے پر، مگر روایتی جوش و جذبے کے ساتھ منانے کا اعلان کیا گیا ہے۔
ذرائع کے مطابق، 23 مارچ کو ہونے والی یہ تقریب ایوانِ صدر کے احاطے میں منعقد ہوگی، جہاں پاکستان کی تینوں مسلح افواج کے دستے شرکت کریں گے اور صدرِ مملکت آصف علی زرداری کو سلامی پیش کریں گے۔ وہ تقریب کے مہمانِ خصوصی ہوں گے۔
پاک فضائیہ کے لڑاکا طیارے فلائی پاسٹ کریں گے جبکہ پاکستان آرمی کا معروف پائپ اینڈ پرکشن بینڈ بھی اپنے فن کا مظاہرہ کرے گا۔ اس موقع پر غیرملکی سفرا اور دیگر اہم شخصیات کو بھی مدعو کیا گیا ہے۔
یوم پاکستان کی یہ تقریبات قومی یکجہتی اور جذبہ حب الوطنی کی عکاسی کریں گی۔
