تونسہ کے ایک سرکاری اسکول کے گودام سے 43 ہزار سے زائد سرکاری کتابیں چوری ہونے کا انکشاف ہوا ہے۔ پولیس نے واقعے کا مقدمہ درج کر کے تحقیقات شروع کر دی ہیں۔
تفصیلات کے مطابق تونسہ کے بوائز ہائی اسکول میں قائم ویئر ہاؤس سے 43,665 کتابیں چوری کر لی گئیں۔ اسسٹنٹ ایجوکیشن آفیسر کی مدعیت میں تھانہ سٹی پولیس نے مقدمہ درج کر لیا ہے، جس میں اسکول کے چوکیدار اور گودام کے ذمہ داروں سمیت سات افراد کو نامزد کیا گیا ہے۔
پولیس کے مطابق یہ کتابیں رواں سال کے نصاب کے لیے تھیں اور انہیں اسی ماہ تونسہ کے سرکاری اسکولوں میں تقسیم کیا جانا تھا۔ واقعے کی تحقیقات جاری ہیں تاکہ کتابوں کی بازیابی اور ذمہ داروں کے خلاف کارروائی عمل میں لائی جا سکے۔
