اسلام آباد:عید الفطر سے پہلے ملک کے مختلف حصوں میں بارشوں کا نیا سلسلہ متوقع ہے۔ خیبر پختونخوا، پنجاب، اسلام آباد اور شمالی علاقہ جات میں بارش کے ساتھ ژالہ باری اور برفباری کا امکان ہے جبکہ سندھ میں گرد آلود ہوائیں چل سکتی ہیں۔ موسمی حالات کے باعث فصلوں، کھمبوں اور سولر پینلز کو نقصان پہنچنے کا خدشہ ہے، اور لینڈ سلائیڈنگ کا خطرہ بھی موجود ہے۔
تفصیلات کے مطابق محکمہ موسمیات نے پیش گوئی کی ہے کہ عید الفطر سے قبل ملک میں بارشوں کا ایک نیا سلسلہ شروع ہونے کا امکان ہے۔ یہ سلسلہ 25 سے 27 مارچ تک جاری رہ سکتا ہے، جس کے دوران ملک کے بالائی اور وسطی علاقوں میں بارش ہوگی، جبکہ پہاڑوں پر برفباری اور بعض مقامات پر ژالہ باری بھی ہو سکتی ہے۔
محکمہ موسمیات کے مطابق خیبر پختونخوا کے مختلف علاقوں جیسے بونیر، دیر، مالاکنڈ، صوابی، چارسدہ، ایبٹ آباد اور پشاور میں 25 سے 27 مارچ کے دوران بارشیں متوقع ہیں۔ اس کے علاوہ کرک، لکی مروت، وزیرستان اور ڈی آئی خان میں بھی 25 اور 26 مارچ کو بارش کا امکان ہے۔ ان علاقوں میں ژالہ باری اور پہاڑوں پر برفباری کا بھی خدشہ ظاہر کیا گیا ہے۔
اسلام آباد، خطۂ پوٹھوہار، مری اور گلیات میں بھی 25 سے 27 مارچ کے دوران بارشیں متوقع ہیں۔ پنجاب کے مختلف شہروں میں بھی انہی دنوں بارش کا امکان ہے۔ دوسری طرف سندھ میں 25 اور 26 مارچ کو گرد آلود ہوائیں چل سکتی ہیں۔ بلوچستان کے علاقوں کوئٹہ، زیارت، ژوب، موسیٰ خیل، چمن اور مستونگ میں بھی بارش کی پیش گوئی کی گئی ہے۔
محکمہ موسمیات نے خبردار کیا ہے کہ شدید آندھی اور ژالہ باری کے باعث کھمبوں، سولر پینلز اور دیگر تنصیبات کو نقصان پہنچنے کا خدشہ ہے۔ بالائی علاقوں میں درمیانے سے شدید درجے کی بارش کے نتیجے میں لینڈ سلائیڈنگ کا خطرہ بھی موجود ہے۔
بالائی پنجاب، اسلام آباد اور خیبر پختونخوا کے مختلف مقامات پر شدید ژالہ باری کا امکان ظاہر کیا گیا ہے، جس کے باعث ان علاقوں میں کھڑی فصلوں کو نقصان پہنچنے کا خطرہ ہے۔ کسانوں کو چاہیے کہ وہ اپنی فصلوں کو بچانے کے لیے ضروری اقدامات کریں۔
