اسلام آباد:اسلام آباد ہائیکورٹ نے بانی پی ٹی آئی عمران خان سے جیل میں ملاقات کے لیے دو دن منگل اور جمعرات مقرر کر دیے ہیں۔ عدالت نے پی ٹی آئی رہنماؤں کو ہدایت کی ہے کہ ملاقات کے بعد میڈیا سے گفتگو کرنے سے گریز کریں۔
یہ فیصلہ بانی پی ٹی آئی کی جیل ملاقاتوں سے متعلق درخواستوں پر سماعت کے دوران سامنے آیا، جس کی سربراہی قائم مقام چیف جسٹس سرفراز ڈوگر نے کی، جبکہ بینچ میں جسٹس ارباب محمد طاہر اور جسٹس محمد اعظم بھی شامل تھے۔
دورانِ سماعت، عدالت نے واضح کیا کہ عمران خان سے صرف وہی افراد ملاقات کر سکیں گے جن کے نام وکیل سلمان اکرم راجہ فراہم کریں گے۔ مزید برآں، عدالت نے حکم دیا کہ پی ٹی آئی کا کوئی بھی رہنما جیل میں ملاقات کے بعد میڈیا سے کوئی بیان نہیں دے گا۔
اسی دوران 190 ملین پاؤنڈ کیس میں عمران خان اور ان کی اہلیہ بشریٰ بی بی نے اپنی سزا معطلی کے لیے بھی درخواستیں دائر کر دی ہیں۔
عدالت نے سماعت مکمل کرتے ہوئے بانی پی ٹی آئی کی ملاقاتوں سے متعلق تمام درخواستیں نمٹا دیں۔
