پاکستان میں شوال کا چاند دیکھ لیا گیا ہے، جس کے بعد ملک بھر میں عید الفطر 31 مارچ بروز پیر کو منائی جائے گی۔ اسلام آباد، لاہور، شیخوپورہ اور گوجرانوالہ سمیت کئی شہروں میں چاند واضح طور پر نظر آیا، جس کی تصدیق رویت ہلال کمیٹی نے کر دی۔
مرکزی رویت ہلال کمیٹی کے چیئرمین مولانا عبدالخبیر آزاد نے اعلان کیا کہ پاکستان میں شوال کا چاند نظر آ گیا ہے اور ملک بھر سے موصول ہونے والی شہادتوں کی بنیاد پر فیصلہ کیا گیا کہ عید الفطر پیر 31 مارچ کو منائی جائے گی۔
رویت ہلال کمیٹی کے مطابق، اسلام آباد، لاہور، شیخوپورہ اور گوجرانوالہ سمیت ملک کے مختلف شہروں سے چاند نظر آنے کی تصدیق ہوئی۔
اس سے قبل مرکزی رویت ہلال کمیٹی کا اجلاس چیئرمین مولانا عبدالخبیر آزاد کی زیر صدارت اسلام آباد میں ہوا۔ اس اجلاس میں علما کرام، اسپارکو اور محکمہ موسمیات کے ماہرین بھی شریک تھے، جو چاند کی رویت کے سائنسی اور دینی پہلوؤں کا جائزہ لے رہے تھے۔
ماہرین کے مطابق، شوال کا چاند گزشتہ روز دوپہر 3 بجکر 59 منٹ پر پیدا ہوا تھا، اور آج مغرب کے وقت اس کی عمر 25 گھنٹے سے زیادہ ہو چکی تھی، جس کے باعث اسے انسانی آنکھ سے با آسانی دیکھا جا سکتا تھا۔
اس اعلان کے بعد ملک بھر میں عید کی تیاریاں تیز ہو گئیں اور بازاروں میں رش بڑھ گیا۔ عوام عید کے استقبال کے لیے پرجوش نظر آ رہے ہیں۔
