نائٹ کلب کی چھت گرنے سے بڑا سانحہ پیش آیا۔ واقعے میں 98 افراد جاں بحق ہوگئے ہیں جن میں ایک گورنر اور سابق بیس بال کھلاڑی بھی شامل ہیں۔ کنسرٹ کے دوران چھت گرنے سے سینکڑوں افراد زخمی ہوئے اور ریسکیو ٹیمیں تاحال امدادی کاموں میں مصروف ہیں۔
تفصیلات کے مطابق جمہوریہ ڈومینیکن کے دارالحکومت سانتو ڈومنگو میں ایک نائٹ کلب کی چھت گرنے کے افسوسناک واقعے میں ہلاک ہونے والوں کی تعداد 98 تک پہنچ گئی ہے۔ ہلاک ہونے والوں میں صوبہ مونٹی کرسٹی کی گورنر نیلسی کروز اور سابق بیس بال کھلاڑی اوکٹاویو ڈوٹیل بھی شامل ہیں۔
برطانوی نشریاتی ادارے کی رپورٹ کے مطابق یہ حادثہ اس وقت پیش آیا جب مشہور گلوکار ربی پیریز کا کنسرٹ جاری تھا اور کلب میں سینکڑوں افراد موجود تھے۔ کنسرٹ کے دوران اچانک چھت گر گئی جس کے نتیجے میں متعدد افراد ملبے تلے دب گئے۔
حکام کا کہنا ہے کہ 150 سے زائد افراد زخمی ہوئے ہیں، جبکہ ریسکیو ٹیمیں مسلسل ملبے میں دبے افراد کو نکالنے میں مصروف ہیں۔ ایمرجنسی آپریشنز سینٹر کے ڈائریکٹر نے بتایا ہے کہ ملبے تلے کچھ لوگ اب بھی زندہ ہو سکتے ہیں، اس لیے امدادی کام تیز رفتاری سے جاری رکھا جا رہا ہے۔
ڈومینیکن صدر نے اس اندوہناک حادثے پر گہرے رنج و غم کا اظہار کیا ہے اور جاں بحق ہونے والوں کے اہل خانہ سے دلی ہمدردی کا اظہار کیا ہے۔
کنسرٹ کے دوران نائٹ کلب کی چھت گر گئی، 98 افراد جاں بحق
حادثہ اس وقت پیش آیا جب مشہور گلوکار ربی پیریز کا کنسرٹ جاری تھا اور کلب میں سینکڑوں افراد موجود تھے
