لاہور:شہدائے ماڈل ٹاؤن کی 11ویں برسی 17جون 2025ء کو منائی جائے گی۔ سیکرٹری جنرل خرم نواز گنڈاپور نے تمام تنظیمات کو ہدایات جاری کی ہیں کہ 17جون کو شہداء کی قبروں پر حاضری دی جائے، پھولوں کی چادریں چڑھائی جائیں اس کے علاوہ شہداء کے درجات کی بلندی کے لئے ایصال ثواب کی محافل منعقد کی جائیں۔
خرم نواز گنڈاپور نے کہا کہ اس وقت سانحہ ماڈل ٹائون کے تمام کیسز عدالتوں میں زیر سماعت ہیں۔ ہم احتجاج کریں تو کس کے خلاف کریں۔ ہم عدالتوں سے استدعا ہی کر سکتے ہیں کہ سانحہ ماڈل ٹائون کے تمام کیسز اور اپیلیں ترجیحاً سنی اور نمٹائی جائیں۔ بالخصوص سٹے آرڈر کا شکار جے آئی ٹی کو کام کرنے کی اجازت دی جائے۔
اسے بھی پڑھیں: ناانصافی ہو رہی ہو تو اُس پر آنکھیں بند نہیں کر سکتے ، سپریم کورٹ
انہوں نے کہا کہ ہماری چیف جسٹس سپریم کورٹ اور چیف جسٹس لاہور ہائیکورٹ سے استدعا ہے کہ وہ زیر التواء اپیلوں پر فیصلے کروائیں تاکہ انصاف کا عمل شروع ہو سکے۔ انہوں نے کہا کہ شیخ الاسلام ڈاکٹر محمد طاہرالقادری نے ہمیشہ قانون کے احترام کی تعلیم دی ہے اور ہم انصاف کے لئے اپنا قانونی حق استعمال کررہے ہیں۔
انسداد دہشت گردی عدالت لاہور سے لیکر لاہور ہائیکورٹ اور سپریم کورٹ تک ہمارے وکلاء پیش ہورہے ہیں۔ انہوں نے کہا کہ امید ہے عدلیہ سانحہ ماڈل ٹائون کے مظلوموں کو انصاف دینے کے لئے ہماری اپیلوں پر ہمدردانہ غور کرے گی۔
