مشہور بھارتی پنجابی اداکارہ اور ماڈل سونم باجوہ، جنہوں نے اپنی خوبصورتی اور بہترین اداکاری کے ذریعے لاکھوں دل جیتے ہیں، نے ٹائیگر شروف کے ساتھ فلم ’باغی 4‘ کا حصہ بننے کا اعلان کیا ہے۔
سونم باجوہ، جو اپنے مداحوں کے ساتھ مسلسل جڑی رہتی ہیں، نے حال ہی میں اپنے انسٹاگرام اکاؤنٹ پر ایک پوسٹ کے ذریعے اس بڑی خبر کا اعلان کیا۔ اپنی پوسٹ میں سونم نے کہا، "میری پہلی ہندی فلم ’ہاؤس فل 5‘ کی شوٹنگ تقریباً مکمل ہوچکی ہے، اور اب میں بہت خوشی اور فخر کے ساتھ اعلان کرتی ہوں کہ میں اپنی اگلی ہندی فلم ’باغی 4‘ کی شوٹنگ کا آغاز کر رہی ہوں۔”
سونم نے مزید لکھا، "مجھے ’ساجد سر‘ اور ان کی ٹیم کے ساتھ دوبارہ کام کرنے کا موقع ملا ہے، اور میں ٹائیگر شروف، سنجے دت سر اور پوری ٹیم کے ساتھ کام کرنے کے لیے بے حد پرجوش ہوں۔ یہ موقع میرے لیے ایک نعمت ہے، اور میں مداحوں کو تفریح فراہم کرنے کے لیے مزید پرعزم ہوں۔ جلد ہی آپ سب سے سینما گھروں میں ملاقات ہوگی!”
’باغی‘ سیریز، جو ایکشن اور شاندار کلیکشن کی بدولت باکس آفس پر اپنی الگ پہچان رکھتی ہے، اپنے چوتھے حصے کے ساتھ واپس آ رہی ہے۔ اس فلم میں سنجے دت منفی کردار میں نظر آئیں گے، اور اے ہرشا کی ہدایت کاری میں بننے والی یہ فلم نادیادوالا گرینڈسن انٹرٹینمنٹ کے بینر تلے پروڈیوس کی جا رہی ہے۔
فلم ’باغی 4‘ کے 5 ستمبر 2025 کو سینما گھروں میں نمائش کے لیے پیش کیے جانے کا اعلان کیا گیا ہے۔ سیریز کے تینوں پچھلے حصے شاندار کامیابیاں سمیٹ چکے ہیں، اور فلم سازوں کو اس نئے حصے سے بھی زبردست توقعات ہیں۔
