یورپی یونین کے بعد برطانیہ کے لیے پروازوں کی بحالی کی راہ ہموار
کراچی:پاکستان کی ایوی ایشن انڈسٹری کے لیے ایک اور خوشخبری سامنے آئی ہے۔ یورپی یونین کے بعد اب برطانیہ کے لیے پروازوں کی بحالی کی راہ ہموار ہو گئی ہے۔
ڈی جی سول ایوی ایشن اتھارٹی نادر شفیع ڈار نے بتایا کہ دسمبر کے تیسرے ہفتے میں برطانوی حکام کے ساتھ آن لائن میٹنگ ہوگی، جبکہ جنوری میں برطانوی محکمہ ٹرانسپورٹ کا وفد پاکستان آئے گا۔
انہوں نے کہا کہ یورپی یونین کی طرح برطانوی حکام بھی ہماری ایوی ایشن اسیسمنٹ کریں گے اور امید ہے کہ مارچ تک برطانیہ کے لیے پروازیں دوبارہ شروع ہو جائیں گی۔
ترجمان پی آئی اے کے مطابق، ماضی میں پاکستان سے برطانیہ کے لیے ہفتہ وار 21 پروازیں چلتی تھیں، جن میں لندن کے لیے 10، مانچسٹر کے لیے 9 اور برمنگھم کے لیے 2 پروازیں شامل تھیں۔
یورپ اور برطانیہ کے لیے پروازوں کی بحالی سے قومی ایئر لائن کی آمدنی میں نمایاں اضافے کی توقع ہے۔
