اسلام آباد:پاکستان میں ایڈز کے نئے کیسز میں تشویشناک اضافہ
تفصیلات کے مطابق پاکستان میں ایچ آئی وی کے نئے کیسز میں تشویشناک اضافہ ہوا ہے۔ 2024 کے پہلے نو ماہ کے دوران ایچ آئی وی کے 9 ہزار 713 کیسز رپورٹ ہوئے، جس کا مطلب ہے کہ ہر ماہ اوسطاً 1 ہزار 79 افراد اس مرض کا شکار ہو رہے ہیں۔
وفاقی وزارت صحت کے مطابق اس سال کے اختتام تک ایچ آئی وی کے مجموعی کیسز 12 ہزار 950 تک پہنچنے کا امکان ہے، جب کہ گزشتہ سال یہ تعداد 12 ہزار 731 تھی۔ حکام کا کہنا ہے کہ اب تک کے کیسز میں مرد 69.4 فیصد، خواتین 20.5 فیصد، خواجہ سرا 4.1 فیصد اور بچے 6 فیصد ہیں۔ اس سال پنجاب میں سب سے زیادہ 5 ہزار 691 کیسز رپورٹ ہوئے، اس کے بعد سندھ میں 2 ہزار 383، خیبر پختونخوا میں 926 اور بلوچستان میں 329 کیسز سامنے آئے۔
اسلام آباد میں 9 ماہ کے دوران 378 جبکہ آزاد کشمیر میں 10 کیسز رپورٹ ہوئے۔ ایچ آئی وی کے بڑھتے کیسز کے پیش نظر ماہرین اور حکام نے خبردار کیا ہے کہ ہائی رسک گروپ سے یہ مرض عام آبادی میں منتقل ہو رہا ہے۔ اس کی بڑی وجوہات میں کم آگہی، غیر محفوظ جنسی تعلقات اور صحت کی سہولتوں میں حفاظتی تدابیر کی کمی شامل ہیں۔
