ترکیہ کے شہر بولو کے پہاڑی علاقے میں واقع مشہور ہوٹل ’اسکی ریزورٹ‘ میں آگ لگنے سے 76 افراد ہلاک ہوگئے، جبکہ کئی افراد جھلسنے اور بھاگتے ہوئے زخمی ہوگئے۔
حکام کے مطابق آگ صبح ساڑھے تین بجے 12 منزلہ گرینڈ کارٹل ہوٹل کے ریسٹورنٹ میں لگی۔ آگ کے شعلے بہت تیزی سے ہوٹل میں پھیل گئے، جس کے باعث مہمانوں نے خوفزدہ ہو کر کھڑکیوں سے چھلانگیں لگانے کی کوشش کی۔ سفید چادریں باندھ کر نیچے اترنے کی کوشش کے دوران کئی افراد زخمی ہوئے۔
ایک عینی شاہد نے بتایا کہ منظر قیامت جیسا تھا۔ کچھ مہمانوں نے دھوئیں سے بھرے کوریڈور سے فرار کی کوشش کی جبکہ ایک باپ اپنے بچے کے لیے مدد کی فریاد کر رہا تھا۔ ہوٹل میں الارم بھی نہیں بجا۔
فائر بریگیڈ اور ایمبولینسیں فوراً موقع پر پہنچیں، آگ پر قابو پا لیا گیا اور سرچ آپریشن مکمل کر لیا گیا۔ ہوٹل میں اس وقت 238 مہمان موجود تھے۔ وزیر داخلہ علی یرلیکایا کے مطابق کچھ لاشوں کی شناخت ڈی این اے ٹیسٹ کے ذریعے کی جا رہی ہے۔
پولیس نے 9 افراد کو تحقیقات کے لیے حراست میں لیا ہے۔ آگ کی وجہ جاننے اور ذمہ داروں کو سزا دینے کے لیے تحقیقات جاری ہیں۔ پراسیکیوٹرز جلد آگ کی وجوہات پر رپورٹ پیش کریں گے۔
صدر رجب طیب اردوان نے حادثے پر گہرے دکھ کا اظہار کرتے ہوئے ایک دن کے قومی سوگ کا اعلان کیا ہے۔یہ حادثہ اس وقت پیش آیا جب انقرہ اور استنبول سے لوگ اسکول کی تعطیلات کے دوران بولو کی پہاڑیوں پر سیر کے لیے پہنچے تھے۔
