دنیا بھر میں زیادہ تر لوگ ملازمت کے دوران دن کا بڑا حصہ دفتر میں گزارتے ہیں، اور اس دوران کئی افراد کو اچانک شدید تھکاوٹ کا سامنا ہوتا ہے۔
اچھی خبر یہ ہے کہ صرف 2 آسان طریقے اپنا کر دفتر میں کام کے دوران ہونے والی اس تھکن پر قابو پایا جا سکتا ہے۔
امریکا میں کی گئی ایک تحقیقی رپورٹ کے مطابق، دفتر میں کچھ دیر وقفہ لینے اور ساتھی ملازمین سے تعاون حاصل کرنے سے تھکاوٹ کم کرنے میں مدد ملتی ہے۔
یہ تحقیق ویک فاریسٹ یونیورسٹی، ورجینیا کامن ویلتھ یونیورسٹی اور نارتھ ویسٹرن یونیورسٹی کے ماہرین نے کی، جس میں 44 افراد کے دفتری معمولات کا تجزیہ کیا گیا۔
بعد ازاں 179 افراد کو ایک کلینیکل ٹرائل میں شامل کر کے دیکھا گیا کہ کام کے دوران مختصر وقفے لینے یا ساتھیوں کے تعاون سے ان کی تھکن پر کیا اثرات مرتب ہوتے ہیں۔
نتائج کیا کہتے ہیں؟
ماہرین کے مطابق:
✔ دفتری اوقات میں مختصر وقفے لینے سے تھکن کا احساس کم ہوتا ہے۔
✔ نیند کا معیار اور سونے کا دورانیہ بہتر ہوتا ہے۔
✔ اگلے دن دفتر میں زیادہ توانائی محسوس ہوتی ہے۔
ماہرین کا کہنا ہے کہ دفتر میں کام کا دباؤ، طویل اوقاتِ کار اور زیادہ ورک لوڈ کے باعث اکثر افراد شدید تھکاوٹ (برن آؤٹ) کا شکار ہو جاتے ہیں۔
ماہرین کے مطابق، کام کے دوران کچھ دیر کے لیے کتاب پڑھنے یا چائے پینے جیسے چھوٹے وقفے لینا ذہنی اور جسمانی حالت بہتر کرنے میں مددگار ثابت ہو سکتے ہیں۔
✔ پانی کی کمی: تحقیق میں یہ بھی انکشاف ہوا کہ دفتر میں بیٹھے رہنے والے لوگ پانی کم پیتے ہیں، جو تھکن کی ایک بڑی وجہ ہے۔
✔ غلط انداز میں بیٹھنا: اگر آپ کی کمر جھکی ہوئی ہو تو اس سے ریڑھ کی ہڈی، گردن اور کمر پر دباؤ پڑتا ہے، جس سے تھکن زیادہ محسوس ہوتی ہے۔
تحقیقات کے مطابق، دن بھر مسلسل کام کرنے سے دماغی تھکن بڑھتی ہے، جو جسمانی تھکاوٹ کی وجہ بن جاتی ہے۔ اگر آپ دن کے اختتام پر کام میں دلچسپی نہیں لے پاتے تو آپ کو وقفہ لینے اور آرام کرنے کی ضرورت ہے۔
یہ چھوٹے مگر آزمودہ طریقے دن بھر کی تھکاوٹ کم کرنے میں مددگار ثابت ہو سکتے ہیں!
