بھارتی کرکٹ ٹیم کے نوجوان بلے باز ابھیشیک شرما نے انگلینڈ کے خلاف ٹی ٹوئنٹی میچ میں شاندار کارکردگی کا مظاہرہ کرتے ہوئے کئی اہم ریکارڈ اپنے نام کر لیے۔
اتوار کو ممبئی میں بھارت اور انگلینڈ کے درمیان پانچواں اور آخری ٹی ٹوئنٹی میچ کھیلا گیا، جس میں انگلینڈ نے بھارت کو پہلے بیٹنگ کی دعوت دی۔ بھارتی ٹیم نے اس موقع کا بھرپور فائدہ اٹھاتے ہوئے 20 اوورز میں 9 وکٹوں کے نقصان پر 247 رنز بنا ڈالے۔
بھارتی ٹیم کے نوجوان اوپنر ابھیشیک شرما نے ریکارڈ ساز اننگز کھیلتے ہوئے محض 37 گیندوں پر سنچری اسکور کی۔ انہوں نے مجموعی طور پر 54 گیندوں پر 135 رنز کی دھواں دار اننگز کھیلی، جس میں 13 بلند و بالا چھکے اور 7 شاندار چوکے شامل تھے۔
ابھیشیک نے بھارت کی جانب سے ٹی ٹوئنٹی انٹرنیشنل میں دوسری تیز ترین سنچری بنانے کا اعزاز حاصل کر لیا۔ اس سے پہلے یہ ریکارڈ روہت شرما کے پاس تھا، جنہوں نے 35 گیندوں پر سنچری بنائی تھی۔
ابھیشیک شرما نے انگلینڈ کے خلاف 135 رنز کی اننگز کھیل کر بھارت کے لیے ٹی ٹوئنٹی انٹرنیشنل میں سب سے بڑا انفرادی اسکور بنانے کا اعزاز بھی حاصل کر لیا۔ اس سے قبل یہ ریکارڈ شبمن گل کے پاس تھا، جنہوں نے 126 رنز بنائے تھے۔
ابھیشیک شرما نے اپنی اننگز کے دوران 13 چھکے لگا کر ایک اور بڑا کارنامہ انجام دیا۔ وہ بھارت کے لیے کسی بھی ٹی ٹوئنٹی انٹرنیشنل میچ میں ایک اننگز میں سب سے زیادہ چھکے لگانے والے کھلاڑی بن گئے۔
بھارتی ٹیم کے 247 رنز کے بڑے ہدف کے تعاقب میں انگلینڈ کی ٹیم دباؤ کا شکار ہوگئی اور محض 11 ویں اوور میں 97 رنز بنا کر آل آؤٹ ہوگئی۔ اس فتح کے ساتھ بھارت نے پانچ میچوں کی سیریز 1-4 سے اپنے نام کر لی۔
