بھارتی اداکار سونو سود نے مبینہ فراڈ کیس میں وارنٹ گرفتاری کی خبروں پر اپنا واضح موقف پیش کیا ہے۔ انہوں نے کہا کہ مشہور شخصیات اکثر آسان ہدف بن جاتی ہیں اور وہ اس معاملے میں سخت قانونی کارروائی کریں گے۔
میڈیا رپورٹس کے مطابق، سونو سود نے زیر گردش خبروں کو سنسنی خیز قرار دیا اور وضاحت کی کہ انہیں صرف گواہ کے طور پر طلب کیا گیا ہے۔ ان کا کہنا تھا کہ ان کا اس کیس سے کوئی تعلق نہیں
ہے۔
اداکار نے مزید کہا کہ ان کے وکلاء 10 فروری کو عدالت میں باضابطہ جواب جمع کرائیں گے۔ انہوں نے یہ بھی کہا کہ یہ معاملہ بے وجہ لوگوں کی توجہ حاصل کرنے کے لیے اچھالا جا رہا ہے۔ واضح رہے کہ بھارتی میڈیا میں یہ خبر گردش کر رہی تھی کہ پنجاب کے شہر لدھیانہ کی مقامی عدالت نے سونو سود کے خلاف وارنٹ گرفتاری جاری کیے ہیں۔
عدالت کا کہنا تھا کہ وہ ایک کیس میں طلب کیے جانے کے باوجود پیش نہیں ہوئے۔ سونو سود نے اس معاملے پر اپنی صفائی پیش کرتے ہوئے کہا کہ وہ قانونی طریقہ کار پر عمل کر رہے ہیں اور کسی بھی غلط فہمی کو دور کرنے کے لیے عدالت میں پیش ہوں گے۔ انہوں نے اس بات پر زور دیا کہ مشہور شخصیات کو اکثر بلا وجہ نشانہ بنایا جاتا ہے اور وہ اس معاملے میں قانونی جنگ لڑیں گے۔
