لاہور:جنوبی افریقا کی ٹیم میں ڈیبیو کرنے والے میتھیو برٹزکے نے شاندار بیٹنگ کا مظاہرہ کرتے ہوئے ون ڈے کرکٹ میں ایک نیا سنگ میل عبور کر لیا۔
تفصیلات کے مطابق، میتھیو برٹزکے ون ڈے ڈیبیو میں 150 رنز بنانے والے پہلے اوپنر بن گئے۔ انہوں نے 148 گیندوں پر مشتمل اپنی اننگز میں 11 چوکے اور 5 چھکے لگائے، جبکہ اس سے پہلے کسی بھی کھلاڑی نے ون ڈے ڈیبیو پر 150 رنز اسکور نہیں کیے تھے۔
اس کے علاوہ، میتھیو برٹزکے نے اپنے ہم وطن کولن انگرام کا ریکارڈ بھی توڑ دیا۔ کولن انگرام نے اپنے ون ڈے ڈیبیو میں 124 رنز بنائے تھے، جبکہ میتھیو برٹزکے 150 رنز بنا کر آؤٹ ہوئے۔
یہی نہیں، جنوبی افریقی اوپنر ون ڈے ڈیبیو میں سنچری بنانے والے چوتھے اور مجموعی طور پر دنیا کے 19ویں کھلاڑی بن گئے ہیں۔ ان سے قبل جنوبی افریقا کے کولن انگرام، ٹیمبا باوما اور ریزا ہینڈرکس اس فہرست میں شامل ہو چکے ہیں۔
ساتھ ہی، میتھیو برٹزکے نصف سنچری بنانے والے جنوبی افریقا کے دوسرے اوپنر بھی بن گئے۔ انہوں نے نیوزی لینڈ کے خلاف میچ میں 68 گیندوں پر اپنی نصف سنچری مکمل کی، جس میں 3 چوکے اور ایک چھکا شامل تھا۔
پاکستان کی طرف سے انضمام الحق اور عابد علی نے اپنے ون ڈے ڈیبیو پر سنچری بنانے کا اعزاز حاصل کیا ہے۔
دیگر ممالک میں انگلینڈ، نیوزی لینڈ اور ویسٹ انڈیز کے دو دو کھلاڑی جبکہ بھارت، آسٹریلیا، ہانگ کانگ، اسکاٹ لینڈ، تھائی لینڈ، زمبابوے اور افغانستان کے ایک ایک کھلاڑی نے اپنے ون ڈے ڈیبیو پر سنچری اسکور کی ہے۔
