اسلام آباد:بین الاقوامی مالیاتی فنڈ (آئی ایم ایف) کا وفد پاکستان کے دورے کے دوران آج جوڈیشل کمیشن اور سپریم کورٹ کے حکام سے ملاقات کرے گا، جہاں انہیں ججوں کی تقرری کے عمل اور آئینی و قانونی امور پر بریفنگ دی جائے گی۔
ذرائع کے مطابق آئی ایم ایف مشن نے مختلف اداروں کے حکام سے متعدد اہم ملاقاتیں کی ہیں۔ ان ملاقاتوں میں انسداد بدعنوانی، مالی جرائم کی روک تھام، مشکوک ٹرانزیکشنز اور منی لانڈرنگ کے خلاف کیے گئے اقدامات پر بریفنگ دی گئی۔
آئی ایم ایف نے زمینوں کے ریکارڈ کو ڈیجیٹلائز کرنے پر زور دیا ہے تاکہ شفافیت کو یقینی بنایا جا سکے۔ وفد کو دہشت گردی کی مالی معاونت روکنے کے لیے کیے گئے اقدامات سے بھی آگاہ کیا گیا، جبکہ فیڈرل بورڈ آف ریونیو (ایف بی آر) نے ڈیجیٹلائزیشن، اسمگلنگ اور ٹیکس چوری کے انسداد کے حوالے سے بریفنگ دی۔
ذرائع کے مطابق آئی ایم ایف کے وفد نے فیڈرل لینڈ کمیشن اور فنانشل مانیٹرنگ یونٹ کے حکام کے ساتھ ملاقات کی ہے، جب کہ نیشنل اینٹی منی لانڈرنگ اور کاونٹرنگ فنانسنگ آف ٹیررازم اتھارٹی کے علاوہ کابینہ ڈویژن، وزارت خزانہ اور وزارت قانون کے حکام سے بھی بات چیت کی گئی۔
ذرائع کے مطابق آئی ایم ایف وفد کل مزید اداروں کے حکام، بشمول آڈیٹر جنرل آف پاکستان سے بھی ملاقات کرے گا۔
