ممبئی:بالی وڈ کی مشہور اداکارہ جیکولین فرنینڈس کو ویلنٹائن ڈے کے موقع پر 112 کروڑ روپے مالیت کا ایک قیمتی پرائیویٹ جیٹ تحفے میں دیا گیا، جس کا انکشاف ایک رومانوی خط کے ذریعے ہوا۔
بھارتی میڈیا رپورٹس کے مطابق، مالیاتی جرائم کے کیس میں گرفتار سوکیش چندر شیکھر نے جیکولین کو یہ مہنگا تحفہ دیا۔ جیل سے بھیجے گئے ایک خط میں سوکیش نے انکشاف کیا کہ یہ گلف اسٹریم جیٹ جیکولین کے لیے خاص طور پر خریدا گیا ہے، جس کا رجسٹریشن نمبر اداکارہ کی تاریخ پیدائش اور مہینے پر مبنی ہے۔
خط میں سوکیش چندر شیکھر نے لکھا کہ انہوں نے یہ جیٹ اس لیے تحفے میں دیا تاکہ جیکولین اپنے کام کے سلسلے میں دنیا بھر میں آسانی سے سفر کر سکیں۔ انہوں نے مزید وضاحت کی کہ یہ تحفہ کسی غیر قانونی رقم سے نہیں خریدا گیا، بلکہ اسے وہ اپنے ٹیکس ریٹرن میں ظاہر کر رہے ہیں اور گفٹ ٹیکس بھی ادا کریں گے تاکہ اداکارہ کو کسی قانونی پیچیدگی کا سامنا نہ کرنا پڑے۔
واضح رہے کہ سوکیش چندر شیکھر 2015 میں کروڑوں روپے کے مالیاتی فراڈ کیس میں ملوث ہونے کے باعث کئی برس سے جیل میں قید ہیں، اور اس سے قبل بھی وہ جیکولین کو قیمتی تحائف دینے کے حوالے سے خبروں میں رہ چکے ہیں۔
