بھارتی کرکٹ ٹیم نے آئی سی سی چیمپئنز ٹرافی 2025 کے لیے اپنی نئی جرسی کی رونمائی کردی۔ اس جرسی میں سب سے زیادہ توجہ جس چیز نے حاصل کی، وہ یہ تھی کہ آیا اس پر میزبان ملک ‘پاکستان’ کا نام درج ہے یا نہیں؟ کیونکہ بھارتی میڈیا پہلے یہ دعویٰ کر چکا تھا کہ بھارتی ٹیم کی جرسی پر پاکستان کا نام نہیں لکھا ہوگا۔ تاہم، آئی سی سی کے قوانین کے مطابق، میزبان ملک کا نام ہر ٹیم کی جرسی پر ہونا ضروری ہے۔ رونمائی کے بعد سامنے آئی تصاویر سے تصدیق ہوگئی کہ بھارتی ٹیم کی جرسی پر چیمپئنز ٹرافی کا لوگو اور پاکستان کا نام موجود ہے۔
تفصیلات کے مطابق بھارتی کرکٹ ٹیم نے پیر کے روز آئی سی سی چیمپئنز ٹرافی 2025 کے لیے اپنی نئی جرسی کی رونمائی کردی۔ بھارتی کپتان روہت شرما، ویرات کوہلی، رویندر جڈیجا، ہاردک پانڈیا اور ارشدیپ سنگھ سمیت دیگر کھلاڑیوں کو نئی جرسی میں تصاویر کھنچواتے ہوئے دیکھا گیا۔
لیکن اس جرسی سے زیادہ جس بات نے سب کی توجہ حاصل کی، وہ یہ تھی کہ آیا اس پر میزبان ملک پاکستان کا نام درج ہے یا نہیں؟ کیونکہ بھارتی میڈیا پہلے دعویٰ کر چکا تھا کہ چیمپئنز ٹرافی کے لیے بھارتی ٹیم کی کٹ پر پاکستان کا نام نہیں لکھا جائے گا۔
گزشتہ دنوں بھارت کی جانب سے آئی سی سی چیمپئنز ٹرافی کے منظور شدہ لوگو کو جرسی پر لگانے کے حوالے سے تنازع کھڑا کرنے کی کوشش کی گئی تھی۔ حالانکہ آئی سی سی قوانین کے مطابق ہر ٹیم کی جرسی پر چیمپئنز ٹرافی کا لوگو اور میزبان ملک کا نام ہونا ضروری ہے، چاہے میچ کہیں بھی کھیلا جائے۔
بعد ازاں بھارتی کرکٹ بورڈ کے سیکرٹری نے تصدیق کی کہ بھارتی ٹیم آئی سی سی کے اصولوں پر عمل کرے گی اور ان کی جرسی پر چیمپئنز ٹرافی کے میزبان ملک پاکستان کا نام درج ہوگا۔
پیر کو آئی سی سی نے بھارتی کھلاڑیوں کی تصاویر شیئر کیں، جنہیں چیمپئنز ٹرافی 2025 کے سلسلے میں آئی سی سی ایوارڈز اور ٹیم آف دی ایئر کی ٹوپیاں دی گئیں۔ ان تصاویر میں بھارتی کھلاڑیوں کی جرسی پر چیمپئنز ٹرافی کا لوگو اور پاکستان کا نام واضح طور پر نظر آیا۔
یہ حالیہ برسوں میں پہلا موقع ہے جب بھارتی ٹیم کی جرسی پر پاکستان کا نام تحریر کیا گیا ہے۔ اس سے قبل، ایشیا کپ 2023 کے دوران بھی بھارت نے تنازع کھڑا کرنے کی کوشش کی تھی، جس کے بعد ایشین کرکٹ کونسل نے لوگو پر میزبان ملک کا نام نہ لکھنے کی منظوری دی تھی۔
آئی سی سی چیمپئنز ٹرافی 19 فروری سے شروع ہو رہی ہے، جس کا افتتاحی میچ میزبان پاکستان اور نیوزی لینڈ کے درمیان کراچی کے نیشنل اسٹیڈیم میں ہوگا۔
بھارتی ٹیم اپنے تمام میچز دبئی میں کھیلے گی، جبکہ شائقین کو سب سے زیادہ جس مقابلے کا انتظار ہے، وہ پاک بھارت ٹاکرا ہے، جو 23 فروری کو دبئی میں ہوگا۔
