چیمپئنز ٹرافی کے تیسرے میچ میں جنوبی افریقہ نے افغانستان کو 107 رنز سے شکست دے دی۔ 316 رنز کے ہدف کا تعاقب کرتے ہوئے افغان ٹیم 208 رنز پر ڈھیر ہو گئی۔ جنوبی افریقی بلے باز ریان ریکیلٹن نے شاندار سنچری اسکور کی، جبکہ کیگیسو رباڈا کی عمدہ بولنگ نے جیت میں اہم کردار ادا کیا۔
کراچی:آئی سی سی چیمپئنز ٹرافی کے تیسرے میچ میں جنوبی افریقہ نے افغانستان کو 107 رنز سے شکست دے دی۔نیشنل اسٹیڈیم کراچی میں کھیلے گئے اس میچ میں جنوبی افریقہ نے ٹاس جیت کر پہلے بیٹنگ کرنے کا فیصلہ کیا اور مقرر50 اوورز میں 6 وکٹوں کے نقصان پر 315 رنز بنائے۔
جنوبی افریقہ کی پہلی وکٹ 28 رنز پر گری جب ٹونی ڈی زورزی 11 رنز بنا کر آؤٹ ہوگئے۔ 157 کے مجموعی اسکور پر کپتان ٹیمبا باوُوما 58 رنز بنا کر پویلین لوٹے۔ سب سے نمایاں بلے باز ریان ریکیلٹن رہے، جنہوں نے 103 رنز کی شاندار اننگز کھیلی اور بدقسمتی سے رن آؤٹ ہوگئے۔
دیگر بلے بازوں میں راسی وان ڈیر ڈوسن نے 52، ڈیوڈ ملر نے 14 اور ایڈن مارکرم نے 52 رنز اسکور کیے جبکہ ویان ملڈر 12 رنز کے ساتھ ناقابل شکست رہے۔ مارکو جانسن بغیر کوئی رن بنائے آؤٹ ہوئے۔
افغانستان کی جانب سے محمد نبی نے دو کھلاڑیوں کو آؤٹ کیا، جبکہ فضل حق فاروقی، عظمت اللہ عمرزئی اور نور احمد نے ایک، ایک وکٹ حاصل کی۔
افغانستان کی اننگز:
316 رنز کے ہدف کے تعاقب میں افغانستان کی پوری ٹیم 43.3 اوورز میں 208 رنز بنا کر پویلین لوٹ گئی۔ افغان بلے باز رحمت شاہ 90 رنز کے ساتھ نمایاں رہے، جبکہ راشد خان اور عظمت اللہ عمرزئی نے 18، 18 رنز بنائے۔
دیگر کھلاڑیوں میں ابراہیم زادران 17، صدیق اللہ اٹل 16، گلبدین نائب 13، رحمان اللہ گربز 10، نور احمد 9 اور محمد نبی 8 رنز بنا کر آؤٹ ہوئے۔ کپتان حشمت اللہ شاہدی صفر پر ہی پویلین لوٹ گئے۔
جنوبی افریقی بولرز میں کیگیسو رباڈا نے شاندار کارکردگی کا مظاہرہ کرتے ہوئے 3 وکٹیں حاصل کیں، جبکہ وائین ملڈر اور لنگی اینگیڈی نے 2، 2 کھلاڑیوں کو آؤٹ کیا۔ مارکو جینسن اور کیشو مہاراج نے بھی ایک، ایک وکٹ حاصل کی۔
