معروف پنجابی گلوکار اور اداکار گرو رندھاوا اپنی نئی فلم شانکی سردار کی شوٹنگ کے دوران اسٹنٹ کرتے ہوئے زخمی ہوگئے، جس کے بعد انہیں اسپتال منتقل کردیا گیا۔ انہوں نے انسٹاگرام پر اپنی ایک تصویر شیئر کی جس میں وہ اسپتال کے بستر پر لیٹے ہوئے نظر آرہے ہیں۔
پنجابی موسیقی کے مشہور گلوکار اور اداکار گرو رندھاوا اپنی آنے والی فلم شانکی سردار کے ایک ایکشن سین کے دوران زخمی ہوگئے۔ انہوں نے اپنی انسٹاگرام پوسٹ میں اسپتال کے بستر سے ایک تصویر شیئر کی، جس میں ان کے چہرے پر واضح خراشیں دیکھی جا سکتی ہیں۔
گرو رندھاوا نے اپنی پوسٹ میں لکھا "میرا پہلا اسٹنٹ، میری پہلی چوٹ، لیکن میری روح مضبوط ہے۔ فلم شانکی سردار کے سیٹ سے ایک یاد۔ ایکشن سین کرنا واقعی مشکل کام ہے، لیکن میں اپنے ناظرین کے لیے محنت کرتا رہوں گا۔”
ان کی اس پوسٹ پر شوبز انڈسٹری سے تعلق رکھنے والے کئی افراد نے تشویش اور نیک خواہشات کا اظہار کیا۔ معروف اداکار انوپم کھیر نے حوصلہ بڑھاتے ہوئے کہا:
"آپ سب سے بہترین ہیں، جلد صحتیاب ہوں!”
جبکہ مشہور گلوکار میکا سنگھ نے بھی ان کی جلد صحتیابی کی دعا کی۔
یاد رہے کہ گرو رندھاوا بھارتی پنجاب سے تعلق رکھنے والے ایک کامیاب گلوکار، شاعر اور میوزک کمپوزر ہیں۔ ان کے مقبول ترین گانوں میں لاہور، اشارے تیرے، سلولی سلولی اور تیرے تے شامل ہیں۔
وہ اپنی نئی فلم شانکی سردار میں نمرت اہلووالیا کے ساتھ مرکزی کردار نبھا رہے ہیں، جو اگلے سال سینما گھروں کی زینت بنے گی۔
