لاہور:لاہور ہائیکورٹ نے پاکستان تحریک انصاف (پی ٹی آئی) کی 22 مارچ کو مینار پاکستان پر جلسہ کرنے کی اجازت کی درخواست مسترد کر دی۔ عدالت نے درخواست گزار کو ہدایت کی کہ وہ پہلے متعلقہ کمیٹی سے رجوع کرے اور اگر وہاں سے کوئی فیصلہ نہ ہو تو دوبارہ عدالت آ سکتا ہے۔
تفصیلات کے مطابق لاہور ہائیکورٹ کے جسٹس فاروق حیدر نے پی ٹی آئی رہنما اکمل باری کی درخواست پر سماعت کی، جس میں مؤقف اختیار کیا گیا تھا کہ پی ٹی آئی 22 مارچ کو آئین و قانون کے مطابق مینار پاکستان گراؤنڈ میں جلسہ کرنا چاہتی ہے۔ درخواست گزار نے بتایا کہ جلسے کی اجازت کے لیے انتظامیہ کو درخواست دی گئی تھی، لیکن کوئی جواب نہیں ملا۔
درخواست میں استدعا کی گئی تھی کہ عدالت انتظامیہ کو ہدایت دے کہ وہ پی ٹی آئی کو 22 مارچ کے روز مینار پاکستان پر جلسے کی اجازت دے۔ تاہم، لاہور ہائیکورٹ کے رجسٹرار آفس نے درخواست پر اعتراض عائد کرتے ہوئے کہا کہ اسے پہلے متعلقہ کمیٹی کے سامنے دائر کیا جانا چاہیے تھا۔
عدالت نے رجسٹرار آفس کے اعتراض کو برقرار رکھتے ہوئے درخواست خارج کر دی اور درخواست گزار کو ہدایت دی کہ وہ پہلے ریڈرسل کمیٹی سے رجوع کرے۔ عدالت نے مزید کہا کہ اگر کمیٹی کوئی فیصلہ نہیں کرتی تو پھر درخواست گزار عدالت سے رجوع کر سکتا ہے۔
