حافظ آباد:تحریک منہاج القرآن کے بانی و سرپرست اعلیٰ شیخ الاسلام پروفیسر ڈاکٹر محمد طاہرالقادری کی 74ویں سالگرہ کے موقع پر منعقدہ سیمینار خطاب کرتے ہوئے میاں ریحان مقبول نے کہا کہ شیخ الاسلام پروفیسر محمد ڈاکٹر طاہرالقادری نے اس قوم کے بچوں کو تعلیم اور تربیت دی ہے اور قوم کی بیٹیوں کے لئے بین الاقوامی معیار کے تعلیمی ادارے قائم کئے ہیں۔ شرح خواندگی میں اضافہ کے جب بھی اعداد و شمار جمع کئے جائیں گے تو اس میں ڈاکٹر طاہرالقادری کا عملی کردار نمایاں نظر آئے گا، انہوں نے مزید کہا کہ ڈاکٹر طاہرالقادری نے اپنی خداداد بصیرت سے ایک دہائی قبل پاکستان کو لاحق مرض کی نشاندہی کر دی تھی کہ نظام انتخاب کو شفاف بنائے بغیر عوام کے مسائل حل نہیں ہوں گے۔
انجینئر محمد رفیق نجم نے کہا کہ موجودہ نظام انتخاب تعلیم یافتہ نمائندوں کے اسمبلیوں میں داخلے میں رکاوٹ ہے۔ انہوں نے کہا کہ اسمبلیوں میں سب کچھ ہوتا ہے مگر عوام کے حقوق کے تحفظ کے لئے کوئی بات نہیں ہوتی۔ انہوں نے کہا کہ پبلک اکائونٹس کمیٹی نے انکشاف کیا ہے کہ بجلی کے صارفین سے اووربلنگ کی مد میں 21ارب روپے وصول کرنے والے افسروں اور اہلکاروں کے خلاف کوئی کارروائی نہیں ہوئی اور 300بڑے بجلی چور 877ارب روپے کے نادہندہ ہیں۔ انہوں نے کہا کہ اگر یہ اسمبلی عوام کے حقیقی نمائندوں پر مشتمل ہوتی 21ارب تو کیا عوام کی جیب سے ناجائز طور پر کوئی 21پیسے بھی نہ نکال سکتا۔ انہوں نے کہا کہ یہ کیسی جمہوریت ہے کہ جس میں دن دہاڑے جعلی دودھ، جعلی پانی، جعلی دوائیاں اور جعلی خوراک فروخت ہوتی ہے اور کسی کے خلاف کوئی کارروائی نہیں ہوتی۔ سیمینار میں ضلعی صدر عوامی تحریک ملک شفیق الرحمن، جنرل سیکرٹری سیٹھ ایوب، ڈسٹرکٹ آرگنائزر عبدالرزاق، سرپرست ملک سلطان، ڈاکٹر بابر شہزاد گورائیہ، محمد ارشد رحمانی، سکندر نواز بھٹی، ضلعی صدر منہاج ویمن لیگ باجی فاطمہ، حافظ تنویر ساجد اور بڑی تعداد میں کارکنوں نے شرکت کی۔
