اسلام آباد:متحدہ عرب امارات کے ولی عہد شیخ خالد بن محمد بن زاید النہیان کل پاکستان کے ایک روزہ دورے پر پہنچ رہے ہیں۔ اس دورے کو دونوں ممالک کے تعلقات میں مزید بہتری اور دوطرفہ تعاون کے فروغ کے لیے انتہائی اہم قرار دیا جا رہا ہے۔
تفصیلات کے مطابق متحدہ عرب امارات کے ولی عہد شیخ خالد بن محمد بن زاید النہیان کل پاکستان کا ایک روزہ دورہ کریں گے۔ اپنے دورے کے دوران وہ پاکستان کی سیاسی قیادت سے ملاقاتیں کریں گے، جن میں دوطرفہ تعلقات اور مختلف شعبوں میں تعاون بڑھانے پر بات چیت ہوگی۔
ولی عہد کی ملاقات صدر آصف علی زرداری اور وزیر اعظم شہباز شریف سے ہوگی، جہاں اہم معاہدوں پر دستخط کا امکان ہے۔ صدر آصف علی زرداری انہیں پاکستان کے اعلیٰ ترین اعزاز نشانِ پاکستان سے نوازیں گے۔ یہ تقریب ایوانِ صدر میں منعقد ہوگی، جس میں وزیر اعظم شہباز شریف اور آرمی چیف جنرل عاصم منیر بھی شریک ہوں گے۔
ولی عہد کا خصوصی طیارہ چکلالہ ایئربیس پر لینڈ کرے گا، جہاں ان کے استقبال کے لیے خصوصی انتظامات کیے جا رہے ہیں۔ پاکستان اور متحدہ عرب امارات کے درمیان اس دورے کو انتہائی اہم تصور کیا جا رہا ہے، جو دونوں ممالک کے باہمی تعلقات کو مزید مضبوط کرنے میں معاون ثابت ہوگا۔
