وفاقی حکومت نے پیٹرولیم مصنوعات کی قیمتوں میں کمی کا اعلان کر دیا، جس کا اطلاق یکم مارچ سے اگلے 15 روز تک ہوگا۔ فنانس ڈویژن کے جاری کردہ نوٹیفکیشن کے مطابق، عالمی مارکیٹ میں تیل کی قیمتوں میں اتار چڑھاؤ کو مدنظر رکھتے ہوئے نئی قیمتیں مقرر کی گئی ہیں۔ ہائی اسپیڈ ڈیزل کی قیمت میں 5 روپے 31 پیسے جبکہ پیٹرول کی قیمت میں 50 پیسے کمی کی گئی ہے۔ مٹی کے تیل اور لائٹ ڈیزل آئل کی قیمتیں بھی کم کر دی گئی ہیں۔
تفصیلات کے مطابق وفاقی حکومت نے پیٹرولیم مصنوعات کی قیمتوں میں کمی کا اعلان کر دیا، جس کا اطلاق یکم مارچ 2025 سے ہوگا اور یہ اگلے 15 روز تک برقرار رہے گا۔ اس حوالے سے فنانس ڈویژن کی جانب سے نوٹیفکیشن بھی جاری کر دیا گیا ہے۔
نوٹیفکیشن کے مطابق، آئل اینڈ گیس ریگولیٹری اتھارٹی (اوگرا) نے عالمی مارکیٹ میں تیل کی قیمتوں میں ہونے والے ردوبدل کا جائزہ لینے کے بعد نئی قیمتوں کا تعین کیا ہے تاکہ صارفین کو ریلیف فراہم کیا جا سکے۔
حکومت نے ہائی اسپیڈ ڈیزل کی قیمت میں 5 روپے 31 پیسے فی لیٹر کمی کر دی ہے، جس کے بعد اس کی نئی قیمت 263 روپے 95 پیسے سے کم ہو کر 258 روپے 64 پیسے ہوگئی ہے۔
پیٹرول کی قیمت میں معمولی کمی کرتے ہوئے اسے 50 پیسے فی لیٹر کم کر دیا گیا ہے، جس کے بعد اس کی نئی قیمت 256 روپے 13 پیسے سے گھٹ کر 255 روپے 63 پیسے ہو گئی ہے۔
نوٹیفکیشن کے مطابق، مٹی کے تیل کی قیمت میں 3 روپے 53 پیسے کمی کی گئی ہے، جس کے بعد اس کی نئی قیمت 168 روپے 12 پیسے مقرر کی گئی ہے۔ اسی طرح، لائٹ ڈیزل آئل کی قیمت میں 2 روپے 57 پیسے کمی کے بعد اس کی نئی قیمت 153 روپے 34 پیسے ہو گئی ہے۔
