سعودی عرب نے مستقبل کی ٹرانسپورٹ کو جدید بنانے کے لیے بڑا قدم اٹھایا ہے۔ حکومت نے فلائنگ کاروں کی تیاری کے لیے 30 ملین ڈالر کی سرمایہ کاری کا اعلان کیا ہے، جس کے تحت امریکی کمپنی ڈورونی ایرو اسپیس کے ساتھ معاہدہ کیا گیا ہے۔ اس منصوبے کے تحت جدید برقی ہوائی گاڑی (HX-1) تیار کی جائے گی، جو دو نشستوں پر مشتمل ہوگی اور گھر میں چارج کرنے کے قابل ہوگی۔
HX-1 ایک ایسی فلائنگ کار ہوگی جسے گیراج میں آسانی سے پارک کیا جا سکے گا اور یہ عمودی انداز میں اڑان بھرنے کی صلاحیت رکھے گی۔ یہ منصوبہ سعودی کمپنی Innovation Wings Industries (IWI) کے ذریعے طے پایا ہے، جو Kingdom Aero Industries (KAI) کے نام سے کام کر رہی ہے۔
ڈورونی ایرو اسپیس کے سی ای او ڈورون میرڈنگر کے مطابق، HX-1 فلائنگ کار 2026 تک مارکیٹ میں لائی جائے گی، جبکہ 2027 سے سعودی عرب میں اس کی تیاری کا آغاز ہوگا۔
یہ 30 ملین ڈالر کی سرمایہ کاری دو مراحل میں مکمل ہوگی۔ پہلے مرحلے میں 5 ملین ڈالر فوری طور پر فراہم کیے جائیں گے، جبکہ باقی 25 ملین ڈالر آئندہ دو سال میں اس وقت دیے جائیں گے جب اہم اہداف حاصل کر لیے جائیں گے۔ معاہدے کے تحت KAI کمپنی کو ڈورونی ایرو اسپیس میں 40 فیصد حصص دیے جائیں گے۔
یہ منصوبہ سعودی عرب کے ویژن 2030 کا حصہ ہے، جس کا مقصد ملک کی معیشت کو تیل پر انحصار سے ہٹ کر جدید ٹیکنالوجی کی طرف لے جانا ہے۔ اس منصوبے سے سعودی عرب ٹرانسپورٹ کے شعبے میں ایک نئی انقلابی تبدیلی لانے کی تیاری کر رہا ہے۔
