امریکی صدر ڈونلڈ ٹرمپ نے 2026 کے فیفا ورلڈ کپ کی تیاریوں کے لیے وائٹ ہاؤس میں ایک خصوصی ٹاسک فورس بنانے کا اعلان کیا ہے۔ یہ ورلڈ کپ امریکا، کینیڈا اور میکسیکو میں مشترکہ طور پر منعقد ہوگا، جس میں 48 ٹیمیں حصہ لیں گی اور 104 میچز کھیلے جائیں گے۔ صدر ٹرمپ خود اس ٹاسک فورس کی قیادت کریں گے، جس کا مقصد ٹورنامنٹ کی سیکیورٹی اور منصوبہ بندی کو یقینی بنانا ہے۔
امریکی صدر ڈونلڈ ٹرمپ نے اعلان کیا ہے کہ 2026 کے فیفا ورلڈ کپ کی تیاری کے لیے وائٹ ہاؤس میں ایک ٹاسک فورس قائم کی جائے گی۔ غیر ملکی میڈیا کے مطابق، یہ ٹورنامنٹ امریکا، کینیڈا اور میکسیکو میں مشترکہ طور پر منعقد ہوگا، جس میں دنیا بھر سے 48 ٹیمیں شرکت کریں گی اور مجموعی طور پر 104 میچز کھیلے جائیں گے۔
فیفا ورلڈ کپ 2026 کا فائنل 19 جولائی کو نیو جرسی کے مشہور میٹ لائف اسٹیڈیم میں ہوگا۔ صدر ٹرمپ نے اعلان کیا ہے کہ وہ خود اس ٹاسک فورس کی سربراہی کریں گے، جبکہ نائب صدر جے ڈی وینس کو اس کا نائب سربراہ مقرر کیا گیا ہے۔ یہ ٹاسک فورس وفاقی حکومت کی مختلف ایجنسیوں کے ساتھ مل کر ٹورنامنٹ کی سیکیورٹی، لاجسٹکس اور دیگر منصوبہ بندی کی نگرانی کرے گی۔
فیفا کے صدر جیانی انفینٹینو نے اس فیصلے کا خیرمقدم کرتے ہوئے کہا ہے کہ یہ ٹاسک فورس ورلڈ کپ کی کامیابی اور سیکیورٹی کو یقینی بنانے میں اہم کردار ادا کرے گی۔ انہوں نے مزید کہا کہ اس ایونٹ کے دوران 100 ملین سے زائد سیاح امریکا کا رخ کریں گے، جبکہ فائنل کے موقع پر یہ تعداد 2 بلین تک پہنچ سکتی ہے۔ اس بڑے ٹورنامنٹ سے تقریباً 200,000 نئی نوکریاں پیدا ہونے کی بھی توقع ہے۔
جیانی انفینٹینو نے مزید کہا کہ لاجسٹکس کے لحاظ سے یہ ایک بڑا چیلنج ہوگا، جس کا موازنہ روزانہ کئی سپر باؤل ایونٹس کے انعقاد سے کیا جا سکتا ہے۔
واضح رہے کہ امریکا 2028 میں کیلیفورنیا میں ہونے والے سمر اولمپکس کی میزبانی بھی کرے گا، جو کھیلوں کے عالمی کیلنڈر میں ایک اور بڑا ایونٹ ہوگا۔
