رمضان المبارک میں صحت مند اور تروتازہ رہنے کے لیے متوازن غذا اور ہائیڈریشن بہت ضروری ہے۔ روزے کے دوران جسم طویل وقت تک کھانے اور پانی سے محروم رہتا ہے، اس لیے ایسے مشروبات کا انتخاب کرنا چاہیے جو نہ صرف تازگی فراہم کریں بلکہ غذائیت سے بھی بھرپور ہوں۔ ماہرین کے مطابق رمضان میں کچھ خاص مشروبات پینے سے توانائی بحال رہتی ہے اور روزے کے دوران جسمانی کمزوری کم محسوس ہوتی ہے۔ یہاں ہم ایسے 8 مشروبات پیش کر رہے ہیں جو افطار اور سحری میں پینے کے لیے بہترین ہیں۔
1۔ پانی: سب سے ضروری اور بہترین مشروب
پانی صحت مند زندگی کے لیے سب سے اہم مشروب ہے، خاص طور پر رمضان میں جب جسم کئی گھنٹے پانی کے بغیر رہتا ہے۔ دن بھر کی پیاس بجھانے اور جسم کو تروتازہ رکھنے کے لیے افطار اور سحری میں وافر مقدار میں پانی پینا ضروری ہے۔ روزانہ کم از کم 8 سے 10 گلاس پانی پینے کی کوشش کریں تاکہ جسم ڈی ہائیڈریشن سے محفوظ رہے۔
2۔ کھجور اور دودھ: توانائی بحال کرنے والا مشروب
کھجور اور دودھ کا مشروب رمضان میں توانائی حاصل کرنے کے لیے بہترین انتخاب ہے۔ کھجور قدرتی مٹھاس، فائبر اور ضروری غذائی اجزا سے بھرپور ہوتی ہے، جبکہ دودھ پروٹین اور کیلشیم کا بہترین ذریعہ ہے۔ روزے کے بعد فوری توانائی کے لیے چند کھجوروں کو دودھ میں بھگو کر پینے سے جسم کو زبردست فائدہ ہوتا ہے۔
3۔ خوبانی کا رس: وٹامنز اور فائبر سے بھرپور
رمضان میں خوبانی کا جوس بہت پسند کیا جاتا ہے۔ خوبانی میں فائبر، وٹامن اے اور دیگر ضروری اجزا ہوتے ہیں جو ہاضمے کے لیے مفید ہیں۔ افطار کے وقت یہ جوس پینے سے جسم تازگی محسوس کرتا ہے اور توانائی بحال ہوتی ہے۔
4۔ پودینہ لیمونیڈ: وٹامن سی سے بھرپور مشروب
یہ مشروب لیموں، پودینے اور شہد کے ساتھ تیار کیا جاتا ہے۔ لیموں وٹامن سی سے بھرپور ہوتا ہے جو جسم کو تروتازہ رکھنے میں مدد دیتا ہے۔ پودینہ نظام ہاضمہ کو بہتر بناتا ہے اور جسم کو ٹھنڈک فراہم کرتا ہے، جبکہ شہد قدرتی مٹھاس دیتا ہے۔
5۔ کیلے کا ملک شیک: پوٹاشیم اور وٹامنز کا خزانہ
کیلے میں پوٹاشیم، فائبر، وٹامن سی اور وٹامن بی 6 پایا جاتا ہے۔ دودھ اور کیلے کو بلینڈ کر کے تیار کیا گیا ملک شیک نہ صرف مزیدار ہوتا ہے بلکہ یہ توانائی فراہم کرتا ہے اور روزے کے دوران کمزوری کو روکتا ہے۔
6۔ بادام کا ملک شیک: غذائیت سے بھرپور مشروب
بادام پروٹین، وٹامنز اور معدنیات سے بھرپور ہوتے ہیں۔ رات بھر بھگوئے گئے باداموں کو دودھ، شہد اور الائچی کے ساتھ بلینڈ کر کے یہ صحت بخش مشروب تیار کیا جا سکتا ہے۔ یہ جسم کو دیرپا توانائی دیتا ہے اور افطار کے بعد بھی جسم کو ہلکا اور چست رکھتا ہے۔
7۔ ٹماٹر اور سیب کا جوس: آئرن اور وٹامنز کا مجموعہ
ٹماٹر اور سیب کا جوس وٹامنز، آئرن اور فائبر سے بھرپور ہوتا ہے۔ ٹماٹر، سیب، پانی، لیموں اور شہد کے ساتھ یہ جوس تیار کیا جا سکتا ہے۔ یہ مشروب نہ صرف لذیذ ہوتا ہے بلکہ ہاضمے کو بھی بہتر بناتا ہے اور خون کی کمی کو پورا کرتا ہے۔
8۔ ہیبسکس: تازگی بخش اور صحت مند مشروب
ہیبسکس کا مشروب عرب ممالک میں رمضان کے دوران بہت مشہور ہے۔ اس میں وٹامنز، منرلز اور اینٹی آکسیڈنٹس موجود ہوتے ہیں جو جسم کو ڈی ہائیڈریشن سے بچاتے ہیں اور دل و جگر کی صحت کے لیے مفید ہیں۔ یہ وزن کم کرنے اور بیکٹیریا کے خلاف لڑنے میں بھی مددگار ثابت ہوتا ہے۔
رمضان میں ان صحت بخش مشروبات کا استعمال جسم کو توانا رکھنے میں مدد دیتا ہے۔ آپ کو ان میں سے کون سا مشروب سب سے زیادہ پسند ہے؟
