نیوزی لینڈ نے پاکستان کے خلاف پانچ میچوں کی ٹی ٹوئنٹی سیریز کے لیے اپنی ٹیم کا اعلان کر دیا ہے، جس میں مائیکل بریسویل کو قیادت سونپی گئی ہے۔ کچھ اہم کھلاڑی آئی پی ایل میں مصروف ہونے کے باعث ٹیم کا حصہ نہیں ہوں گے، جبکہ چند نئے اور تجربہ کار کھلاڑیوں کو اسکواڈ میں شامل کیا گیا ہے۔
نیوزی لینڈ کرکٹ بورڈ کے مطابق 16 مارچ سے پاکستان کے خلاف شروع ہونے والی ٹی ٹوئنٹی سیریز کے لیے ٹیم تشکیل دی گئی ہے، جس میں چیمپئنز ٹرافی اسکواڈ کے سات کھلاڑی بھی شامل ہیں۔
تاہم، کچھ اہم کھلاڑی اس سیریز میں شرکت نہیں کر سکیں گے، جن میں لوکی فرگوسن، ڈیون کونوے، گلین فلپس، رچن روندرا اور مچل سینٹنر شامل ہیں، کیونکہ یہ کھلاڑی انڈین پریمیئر لیگ (آئی پی ایل) میں مصروف ہوں گے۔
اسکواڈ میں ایش سودھی اور بین سیئرز کی واپسی ہوئی ہے، جبکہ کائل جیمیسن اور ول او رورکی ابتدائی تین میچز میں کھیلیں گے، اور میٹ ہینری آخری دو میچز میں ٹیم کا حصہ ہوں گے۔
کپتان مائیکل بریسویل کے ساتھ اسکواڈ میں شامل دیگر کھلاڑیوں میں فن ایلن، مارک چیپ مین، جیکب ڈفی، زیک فوکس، مچ ہے، میٹ ہینری، کائل جیمیسن، ڈیرل مچل، جمی نیشم، ول او رورکی، ٹم رابن سن، بین سیئرز، ٹم سائفرٹ اور ایش سودھی شامل ہیں۔
نیوزی لینڈ کرکٹ بورڈ نے واضح کیا ہے کہ ون ڈے ٹیم کا اعلان بعد میں کیا جائے گا۔
