دبلا پتلا نظر آنے کی خواہش جان لیوا ثابت ہوئی، 6 ماہ تک صرف پانی پر گزارا کرنے والی لڑکی زندگی کی بازی ہار گئی۔
تفصیلات کے مطابق، دبلا اور اسمارٹ نظر آنا تقریباً ہر لڑکی کی خواہش ہوتی ہے جس کے لیے خواتین ورزش اور ڈائٹنگ کرتی ہیں۔بھارتی میڈیا رپورٹس کے مطابق بھارت کے شہر تھیلاسری سے تعلق رکھنے والی 18 سالہ لڑکی کی اسمارٹ دکھائی دینے کی خواہش اس کی موت کا سبب بن گئی۔
میڈیا کا کہنا ہے کہ 18 سالہ سری نندا وزن کم کرنے کے لیے مختلف ٹوٹکے آزماتی تھی اور گزشتہ چھ ماہ سے صرف پانی پی کر زندہ تھی جس سے اس کی طبیعت خراب ہوگئی۔
ڈاکٹرز نے بتایا کہ سری نندا کی حالت زیادہ خراب ہونے پر اسے آئی سی یو میں وینٹی لیٹر پر رکھا گیا تھا۔ اس کا وزن صرف 24 کلو رہ گیا تھا جبکہ اس کا شوگر لیول، سوڈیم اور بلڈ پریشر بھی بہت کم تھا۔ طبی امداد کے باوجود سری نندا کی حالت بہتر نہ ہوسکی اور وہ چل بسی۔
ڈاکٹرز کے مطابق 18 سالہ لڑکی anorexia نامی بیماری میں مبتلا تھی۔ اس بیماری میں مریضوں کو وزن کم کرنے کا جنون ہوتا ہے جس کی وجہ سے وہ کھانا پینا چھوڑ دیتے ہیں۔
دوسری جانب لڑکی کے والدین نے بتایا کہ وہ بیٹی کو کھانا دیتے تھے لیکن وہ کھانا چھپا دیتی تھی اور صرف گرم پانی پی کر گزارا کرتی تھی۔
