پنجاب اسمبلی میں ’’دو ایوانی نظام‘‘ لانے کی قرارداد کثرت رائے سے منظور

لاہور :پنجاب اسمبلی میں قومی اسمبلی اور سینیٹ کی طرز پر دو ایوانی نظام لانے کی قرارداد کثرت رائے سے منظور کر لی گئی۔ یہ قرارداد حکومتی رکن امجد علی جاوید نے پیش کی، جس میں صوبے میں وفاق کی طرز پر دو ایوانی نظام کے قیام کا مطالبہ کیا گیا تھا، جسے ایوان نے بھاری اکثریت سے منظور کر لیا۔
اجلاس کے دوران حکومتی رکن سارہ احمد نے بنوں حملے کی مذمت اور پاک فوج سے اظہارِ یکجہتی کے لیے ایک اور قرارداد پیش کی، جو بھی کثرتِ رائے سے منظور کر لی گئی۔
ایوان میں اظہارِ خیال کرتے ہوئے اپوزیشن لیڈر نے حکومت کی پالیسیوں پر سخت تنقید کی اور کہا کہ حکومتی فیصلوں کے باعث کسان شدید مشکلات کا شکار ہیں۔ اس پر وزیرِ زراعت عاشق کرمانی نے ایوان کو آگاہ کیا کہ اب تک ساڑھے چھ لاکھ کاشتکاروں کو کسان کارڈ جاری کیے جا چکے ہیں، جن کے ذریعے پچاس ارب روپے کی خریداری کی جا چکی ہے۔
دورانِ اجلاس حکومتی رکن امجد علی جاوید نے مزدور کی کم از کم تنخواہ 37 ہزار روپے مقرر ہونے کے باوجود اس پر عمل درآمد نہ ہونے پر محکمہ تعلیم اور دیگر سرکاری اداروں کو شدید تنقید کا نشانہ بنایا۔