لاہور:میو اسپتال لاہور میں انجکشن کے ری ایکشن سے مریضوں کی حالت بگڑنے کے معاملے پر ڈائریکٹوریٹ آف ڈرگ کنٹرول نے پنجاب بھر میں نجی کمپنی کے انجکشن کا استعمال فوری روکنے کا حکم جاری کر دیا ہے۔
ڈائریکٹوریٹ آف ڈرگ کنٹرول نے صوبے بھر کی فارمیسیز کو ہدایات جاری کی ہیں کہ انجکشن "ویکسا” اور محلول "نیوٹرولائن” کا استعمال مشتبہ طور پر صحت کے لیے خطرہ ہے، لہٰذا ان کے مخصوص بیچز کا استعمال فوری طور پر بند کیا جائے۔ یہ فیصلہ مریضوں کے تحفظ کے پیش نظر کیا گیا ہے اور ادویات کے ٹیسٹوں کی رپورٹس آنے تک اس حکم پر عمل درآمد کیا جائے گا۔
واضح رہے کہ میو اسپتال لاہور کی چیسٹ وارڈ میں کیفٹرکسون انجکشن کے مبینہ ری ایکشن سے 36 سالہ مریضہ نورین جاں بحق ہو گئی تھی، جب کہ 15 دیگر مریض متاثر ہوئے تھے۔ ان متاثرہ مریضوں میں دولت خان نامی مریض بھی شامل تھا، جو وینٹی لیٹر پر تھا اور بعد ازاں جان کی بازی ہار گیا۔
یاد رہے کہ چند روز قبل وزیراعلیٰ پنجاب مریم نواز نے میو اسپتال کے اچانک دورے کے دوران مریضوں اور ان کے لواحقین کی جانب سے متعدد شکایات موصول ہونے پر میڈیکل سپرنٹنڈنٹ (ایم ایس) کو ان کے عہدے سے ہٹا دیا تھا۔
ڈائریکٹوریٹ آف ڈرگ کنٹرول نے فارمیسیز کو سختی سے ہدایت کی ہے کہ مریضوں کی جانوں کے تحفظ کو مدنظر رکھتے ہوئے یہ ادویات فوری طور پر ہٹا دی جائیں۔ مزید کارروائی کا انحصار ادویات کے ٹیسٹوں کی رپورٹس پر ہوگا، جس کے بعد آئندہ کا لائحہ عمل طے کیا جائے گا۔
