پاکستان کرکٹ ٹیم نے نیوزی لینڈ کے خلاف پہلے ٹی ٹوئنٹی میں بدترین کارکردگی کا مظاہرہ کرتے ہوئے اپنی تاریخ کا نیا منفی ریکارڈ قائم کر دیا۔ کرائسٹ چرچ میں کھیلے گئے میچ میں نیوزی لینڈ نے پاکستان کو صرف 91 رنز پر آل آؤٹ کر دیا اور 92 رنز کا ہدف 10.1 اوورز میں محض ایک وکٹ کے نقصان پر حاصل کر لیا۔ یہ گیندوں کے اعتبار سے ٹی ٹوئنٹی انٹرنیشنل میں پاکستان کی سب سے بڑی شکست ہے۔
کرائسٹ چرچ میں اتوار کو کھیلے گئے پہلے ٹی ٹوئنٹی میچ میں نیوزی لینڈ نے پاکستان کو 9 وکٹوں سے شکست دے کر پانچ میچوں کی سیریز میں 0-1 کی برتری حاصل کر لی۔
میچ میں نیوزی لینڈ کے کپتان نے ٹاس جیت کر پہلے فیلڈنگ کا فیصلہ کیا، جو ٹیم کے حق میں بہترین ثابت ہوا۔ پاکستان کی بیٹنگ لائن بری طرح ناکام رہی اور پوری ٹیم صرف 91 رنز پر ڈھیر ہو گئی۔
نیوزی لینڈ نے 92 رنز کا ہدف باآسانی ایک وکٹ کے نقصان پر 10.1 اوور میں حاصل کر لیا۔ کیویز نے یہ ہدف مقررہ 20 اوورز سے 59 گیندیں پہلے مکمل کیا، جو گیندوں کے اعتبار سے ٹی ٹوئنٹی انٹرنیشنل میں پاکستان کی سب سے بڑی شکست ہے۔
اس سے قبل، 2018 میں آسٹریلیا نے ٹی ٹوئنٹی انٹرنیشنل میں پاکستان کے خلاف 55 گیندیں پہلے ہدف حاصل کر کے پاکستان کو بدترین شکست سے دوچار کیا تھا۔
یہ پہلا موقع نہیں جب نیوزی لینڈ کے خلاف پاکستان کو اتنی بڑی شکست ہوئی ہو۔ 2016 میں ویلنگٹن میں بھی پاکستان کو ایک بدترین شکست کا سامنا کرنا پڑا تھا، جب 196 رنز کے تعاقب میں پاکستانی ٹیم 101 رنز پر آل آؤٹ ہو گئی تھی اور 95 رنز سے ہار گئی تھی۔
پاکستان اور نیوزی لینڈ کے درمیان پانچ میچوں کی سیریز کا دوسرا ٹی ٹوئنٹی میچ منگل کو کھیلا جائے گا، جہاں پاکستان کے پاس اپنی خراب کارکردگی کو بہتر کرنے کا موقع ہوگا۔
