واشنگٹن:امریکی صدر ڈونلڈ ٹرمپ کی انتظامیہ نے نیویارک ٹائمز سمیت چار میڈیا اداروں کو پینٹاگون میں اپنے دفاتر خالی کرنے کا حکم جاری کر دیا ہے۔
اس فیصلے کے مطابق نیشنل پبلک ریڈیو، این بی سی نیوز (کامکاسٹ کارپوریشن کی ملکیت) اور پولیٹیکو کو بھی 14 فروری تک پینٹاگون چھوڑنے کی ہدایت دی گئی ہے۔
یہ اقدام ایک سرکاری میمو کے ذریعے سامنے آیا، جس میں بتایا گیا کہ ان اداروں کی جگہ نیو یارک پوسٹ، ون امریکہ نیوز نیٹ ورک، بریٹ بارٹ نیوز نیٹ ورک اور ہف پوسٹ نیوز کو مخصوص دفاتر دیے جائیں گے۔
میمو کے مطابق، ہر سال ایک نیا میڈیا ادارہ پینٹاگون پریس کور کے رکن کے طور پر نامزد کیا جائے گا، تاکہ مختلف نیوز ایجنسیز کو وہاں رپورٹنگ کا موقع دیا جا سکے۔
یہ فیصلہ اس وقت آیا جب نیویارک ٹائمز نے ایک کھلا خط شائع کیا، جس میں اخبار نے ایماندارانہ رپورٹنگ کی یقین دہانی کرائی تھی۔ اس کے علاوہ، نیویارک ٹائمز نے اپنی رپورٹنگ میں کئی ایسی شہ سرخیاں شائع کیں، جن سے تاثر ملا کہ نو منتخب صدر ٹرمپ اختیارات کی منتقلی کے عمل میں مشکلات کا شکار ہیں۔
