بالی ووڈ کی سابق اداکارہ ممتا کلکرنی نے 10 کروڑ روپے کے بدلے مذہبی عہدہ ’ماہا منڈلیشور‘ حاصل کرنے کی افواہوں کو مسترد کر دیا ہے۔
حالیہ انٹرویو میں ممتا کلکرنی نے کہا کہ ان کے پاس 1 کروڑ روپے بھی نہیں ہیں، تو وہ 10 کروڑ روپے کہاں سے ادا کریں گی؟ انہوں نے وضاحت کی کہ جب انہیں ماہا منڈلیشور بنایا گیا تو انہوں نے 2 لاکھ روپے کسی سے ادھار لے کر اپنے گرو کو دیے تھے۔
ممتا کلکرنی نے حال ہی میں سنیاس لیا ہے۔ انہوں نے ایک انٹرویو میں فلم ’کرن ارجن‘ کے سیٹ پر پیش آنے والے ایک واقعے کا بھی ذکر کیا۔ ان کا کہنا تھا کہ شاہ رخ خان اور سلمان خان شوٹنگ کے دوران ان سے مذاق کیا کرتے تھے۔
انہوں نے بتایا کہ ایک ڈانس سین کے دوران شاہ رخ خان اور سلمان خان کو ان کے ساتھ ڈانس کرنا تھا، لیکن ڈانس ڈائریکٹر نے کہا کہ اس مخصوص شوٹ میں وہ اکیلی ہوں گی۔ اگلے دن جب انہوں نے اپنے ڈانس اسٹیپس ریکارڈ کروائے، تو بعد میں پتہ چلا کہ دونوں خانز پیچھے جھاڑیوں میں چھپ کر ان پر ہنس رہے تھے۔
ممتا کلکرنی نے مزید بتایا کہ ان کے شاٹس مکمل ہونے کے بعد اگلا سین شاہ رخ خان اور سلمان خان کا تھا، جس میں انہیں گھٹنوں کے بل ڈانس کرنا تھا۔ اس وقت تقریباً 5 ہزار افراد شوٹنگ دیکھنے کے لیے موجود تھے۔
اداکارہ نے بتایا کہ اس سین کے دوران ایک کے بعد ایک ری ٹیک ہوتا رہا، یہاں تک کہ 25 ری ٹیک ہو گئے۔ آخر میں فلم کے پروڈیوسر راکیش روشن نے تنگ آ کر شوٹنگ منسوخ کر دی۔
ممتا کلکرنی نے یہ بھی کہا کہ دونوں میں سے سلمان خان زیادہ شرارتی ہیں۔
