نیشنل الیکٹرک پاور ریگولیٹری اتھارٹی (نیپرا) نے کرنٹ لگنے سے بچاؤ کے حفاظتی اقدامات پر عمل نہ کرنے پر ملتان الیکٹرک پاور کمپنی (میپکو)، پشاور الیکٹرک پاور کمپنی (پیسکو) اور ٹرائبل ایریاز الیکٹرک سپلائی کمپنی (ٹیسکو) پر ایک، ایک کروڑ روپے کا جرمانہ عائد کر دیا ہے۔ اسی طرح ہیلتھ، سیفٹی اور انوائرمنٹ ڈائریکٹوریٹ قائم نہ کرنے پر حیدر آباد الیکٹرک سپلائی کمپنی (حیسکو) کو بھی ایک کروڑ روپے کا جرمانہ ادا کرنے کا حکم دیا گیا ہے۔
تفصیلات کے مطابق نیپرا نے بجلی کی تقسیم کار کمپنیوں کی جانب سے مہلک حادثات سے بچاؤ کے ناقص انتظامات پر سخت کارروائی کی ہے۔ نیپرا نے میپکو، پیسکو اور ٹیسکو کو کرنٹ لگنے کے واقعات روکنے کے لیے مناسب اقدامات نہ کرنے پر پہلے شوکاز نوٹس جاری کیے تھے، لیکن کمپنیاں مطمئن کرنے میں ناکام رہیں، جس کے بعد ان پر جرمانہ عائد کر دیا گیا اور اس حوالے سے الگ الگ حکم نامے بھی جاری کیے گئے ہیں۔
جاری کردہ حکم نامے میں واضح کیا گیا ہے کہ یہ تینوں تقسیم کار کمپنیاں نیپرا کے حفاظتی قوانین پر عمل درآمد کرانے میں ناکام رہیں اور اپنے زیرانتظام علاقوں میں بجلی کے کھمبوں کی مکمل ارتھنگ بھی یقینی نہیں بنا سکیں۔
نیپرا نے میپکو، پیسکو اور ٹیسکو کو ہدایت دی ہے کہ وہ تین ماہ کے اندر تمام اسٹیل اسٹرکچرز کی ارتھنگ مکمل کریں جبکہ پی سی سی پولز کی ارتھنگ ایک سال کے اندر مکمل کرنے کا حکم بھی دیا گیا ہے۔
نیپرا نے حیسکو پر بھی کارروائی کرتے ہوئے ہیلتھ، سیفٹی اور انوائرمنٹ ڈائریکٹوریٹ قائم نہ کرنے پر ایک کروڑ روپے کا جرمانہ عائد کر دیا ہے۔
نیپرا کے حکم کے مطابق حیسکو کو جرمانے کی رقم 15 روز کے اندر متعلقہ بینک میں جمع کرانے کی ہدایت دی گئی ہے۔
