سندھ:سیہون میں عظیم صوفی بزرگ حضرت لعل شہباز قلندرؒ کے 773 ویں عرس مبارک کی تقریبات کا باقاعدہ آغاز ہوگیا ہے، جہاں ملک بھر سے زائرین کی بڑی تعداد شرکت کر رہی ہے۔
تفصیلات کے مطابق عرس کی تین روزہ تقریبات کا افتتاح سپیکر سندھ اسمبلی اویس قادر شاہ اور وزیر اوقاف سندھ ریاض شاہ نے درگاہ پر چادر چڑھا کر کیا۔ اس موقع پر مزار پر پھولوں کی چادر چڑھائی گئی اور ملک کی سلامتی و خوشحالی کے لیے دعا کی گئی۔
پنجاب سمیت ملک بھر سے لاکھوں زائرین سیہون شریف پہنچ رہے ہیں، جبکہ شہر کی گلیوں اور درگاہ کے اطراف میں "دمادم مست قلندر” کی صدائیں گونج رہی ہیں۔
سیکیورٹی کے سخت انتظامات کیے گئے ہیں تاکہ زائرین کو ہر ممکن سہولت فراہم کی جا سکے۔
عرس کی تقریبات میں سندھ کی ثقافت کو اجاگر کرنے کے لیے ملھ ملاکھڑا (روایتی کشتی) کے دلچسپ مقابلے بھی ہوں گے۔ رات کو شہباز آڈیٹوریم ہال میں سغھڑن جی کچہری (روایتی علمی و ادبی نشست) اور محفل موسیقی کا بھی اہتمام کیا جائے گا، جہاں مشہور صوفی فنکار اپنے فن کا مظاہرہ کریں گے۔
