پاکستان میں طویل خشک موسم کے بعد ایک نئے بارش کے سسٹم کی آمد متوقع ہے، جو ملک کے مختلف حصوں میں بارشیں اور پہاڑوں پر برف باری لا سکتا ہے۔ محکمہ موسمیات نے پیش گوئی کی ہے کہ یہ سسٹم 18 فروری سے 22 فروری کے درمیان ملک کے بیشتر علاقوں کو متاثر کرے گا، جس سے سردی میں بھی اضافہ ہو سکتا ہے۔
تفصیلات کے مطابق آج پیر 17 فروری کو اسلام آباد میں موسم خشک رہے گا، جبکہ ہوا میں نمی کا تناسب 31 سے 35 فیصد کے درمیان ہوگا۔ وفاقی دارالحکومت میں فضائی آلودگی کا انڈیکس 152 تک پہنچ چکا ہے۔ تاہم، 18 سے 20 فروری کے دوران ایک نیا بارش کا سسٹم پاکستان میں داخل ہوگا، جس کے باعث اسلام آباد، راولپنڈی، اٹک، جہلم، چکوال اور پنجاب کے دیگر علاقوں میں بارش ہونے کا امکان ہے۔
مزید یہ کہ، اسلام آباد اور راولپنڈی میں پولن کی مقدار زیادہ ہوگی، جس میں مزید اضافہ ہوسکتا ہے۔ دوسری جانب لاہور سمیت پنجاب کے مختلف شہروں میں آج موسم ابر آلود رہے گا، جہاں سورج اور بادلوں کے درمیان آنکھ مچولی جاری رہے گی۔ تاہم، آج بارش کا کوئی امکان نہیں اور موسم خشک رہے گا۔ لاہور میں آج کم سے کم درجہ حرارت 10 ڈگری سینٹی گریڈ ریکارڈ کیا گیا، جبکہ زیادہ سے زیادہ درجہ حرارت 25 ڈگری تک پہنچنے کا امکان ہے۔
محکمہ موسمیات کے مطابق، کل 18 فروری کو بارش برسانے والا سسٹم پاکستان میں داخل ہوگا، جو منگل 20 فروری کو پنجاب کے مختلف اضلاع میں بارش کا باعث بنے گا۔ موسمیاتی ماہرین کا کہنا ہے کہ طاقت ور مغربی ہواؤں کی وجہ سے 22 فروری تک ملک کے کئی حصوں میں بارش اور پہاڑوں پر برف باری کا امکان ہے۔
یہ سسٹم پاکستان کے 80 فیصد شمالی علاقوں کو متاثر کرے گا، جس میں خیبر پختونخوا، گلگت بلتستان اور آزاد کشمیر شامل ہیں۔ ان علاقوں میں تیز بارش اور برف باری کی پیش گوئی کی گئی ہے، جبکہ پہاڑوں پر برف باری بھی ہوسکتی ہے۔
بلوچستان میں بھی نئے موسمی سسٹم کے نتیجے میں اچھی بارشوں کی توقع ہے۔ کوئٹہ، زیارت، ژوب، قلعہ سیف اللہ اور خضدار کے پہاڑی علاقوں میں برف باری ہو سکتی ہے۔ تاہم، سندھ میں زیادہ تر علاقوں میں بارش کا امکان نہیں ہے۔ کراچی میں موسم جزوی طور پر ابر آلود رہ سکتا ہے، مگر بارش کی توقع نہیں۔ البتہ، سکھر، لاڑکانہ اور کچھ دیگر علاقوں میں ہلکی بوندا باندی ہوسکتی ہے۔
پنجاب میں 19 سے 21 فروری کے دوران اچھی بارش کا امکان ہے، جبکہ جنوبی اور وسطی پنجاب میں بارش کے 2 سے 3 اسپیل متوقع ہیں۔ اسلام آباد میں بھی اس دوران 2 سے 3 بارش کے اسپیل ہو سکتے ہیں۔
مجموعی طور پر، یہ نیا بارش کا سسٹم ملک کے بیشتر علاقوں میں خشک موسم کا خاتمہ کرے گا اور سردی میں اضافے کا باعث بنے گا۔ موسمی ماہرین نے عوام کو مشورہ دیا ہے کہ وہ موسم کی تبدیلی کو مدنظر رکھتے ہوئے احتیاطی تدابیر اختیار کریں۔
