بالی ووڈ کی متنازع اداکارہ راکھی ساونت نے سوشل میڈیا پر ہندوستانی بھاؤ کو سخت جواب دیا ہے۔ یہ معاملہ اس وقت سامنے آیا جب فرح خان پر ہولی کے تہوار سے متعلق متنازع بیان دینے کے الزام میں شکایت درج کرائی گئی۔ راکھی ساونت نے ہندوستانی بھاؤ پر تنقید کرتے ہوئے کہا کہ جو شخص خود اپنی ویڈیوز میں گالم گلوچ کرتا ہے، وہ دوسروں کو اخلاقیات کا سبق کیسے سکھا سکتا ہے؟
تفصیلات کے مطابق بالی ووڈ کی معروف اداکارہ راکھی ساونت نے ایک بار پھر سوشل میڈیا پر ہنگامہ برپا کر دیا ہے۔ انہوں نے یوٹیوبر اور سوشل میڈیا کری ایٹر وکاس پھاٹک، المعروف ہندوستانی بھاؤ، کو ان کے رویے پر کھری کھری سنادیں۔
یہ معاملہ اس وقت سامنے آیا جب فرح خان کے خلاف ایک شکایت درج کرائی گئی، جس میں ان پر الزام لگایا گیا کہ انہوں نے ہولی کے تہوار سے متعلق توہین آمیز تبصرہ کیا ہے۔
فرح خان، جو ایک مشہور کوریوگرافر اور فلم ساز ہیں، حال ہی میں ایک رئیلٹی شو ‘ماسٹر شیف’ میں شامل ہوئیں، جہاں انہوں نے کہا، "ہولی تمام چھپڑی لوگوں کا پسندیدہ تہوار ہے۔” ان کے اس بیان پر شدید ردعمل دیکھنے میں آیا، اور ہندوستانی بھاؤ نے اسے ہندو برادری کے جذبات کو ٹھیس پہنچانے کے مترادف قرار دے کر پولیس میں شکایت درج کرائی۔
راکھی ساونت نے اس معاملے پر اپنی رائے دیتے ہوئے ہندوستانی بھاؤ پر سخت تنقید کی اور انسٹاگرام پر براہ راست انہیں نشانہ بنایا۔
اپنے ویڈیو پیغام میں راکھی ساونت نے کہا، "ہندوستانی بھاؤ خود اپنی ویڈیوز میں گالیاں دیتا ہے، لیکن کیا اسے لگتا ہے کہ ممبئی پولیس اور سائبر سیل صرف اس کی سنیں گے؟ کیا گالیاں دینے کا حق صرف اسے حاصل ہے؟”
راکھی نے مزید کہا، "فرح خان کے خلاف شکایت درج کرانے سے پہلے حکام کو ہندوستانی بھاؤ کی ویڈیوز دیکھنی چاہیے، جہاں وہ خود نازیبا الفاظ استعمال کرکے شہرت حاصل کرتا ہے۔”
انہوں نے ہندوستانی بھاؤ کو مخاطب کرتے ہوئے کہا، "فرح خان کو کچھ کہنے سے پہلے خود بھی آئینہ دیکھ لو، کیونکہ تم بھی کوئی دودھ کے دھلے نہیں ہو۔”
راکھی ساونت نے سائبر کرائم سیل پر بھی سوال اٹھایا اور کہا، "جب سوشل میڈیا پر لوگ کھلے عام گالیاں دیتے ہیں تو سائبر کرائم سیل کہاں ہوتا ہے؟ پہلے ان لوگوں کے خلاف کارروائی ہونی چاہیے، جو سوشل میڈیا پر بدنظمی پھیلاتے ہیں، پھر بالی ووڈ ستاروں پر انگلی اٹھانی چاہیے۔”
راکھی کی یہ ویڈیو سوشل میڈیا پر وائرل ہوگئی، اور ان کے مداحوں نے بھرپور حمایت کا اظہار کیا۔ کئی صارفین نے ہندوستانی بھاؤ کے رویے پر بھی سوال اٹھائے اور راکھی کی بات سے اتفاق کیا۔
یاد رہے کہ فرح خان کے خلاف درج شکایت میں کہا گیا ہے کہ ان کے تبصرے سے ہندو برادری کے مذہبی جذبات مجروح ہوئے ہیں۔ اس کیس میں تعزیرات ہند کی دفعات 196، 299، 302 اور 353 کے تحت کارروائی کا مطالبہ کیا گیا ہے۔
ہندوستانی بھاؤ کے وکیل کا کہنا ہے، "کسی بھی مقدس تہوار کے بارے میں ’چھپڑی‘ جیسے الفاظ کا استعمال قابلِ مذمت ہے اور اس سے فرقہ وارانہ کشیدگی بڑھنے کا خطرہ ہے۔”
