آرمی چیف جنرل عاصم منیر نے بہاولپور میں طلبہ سے گفتگو کرتے ہوئے دہشت گردی کے پس پردہ عوامل پر روشنی ڈالی۔ ان کا کہنا تھا کہ دہشت گردی کے پیچھے ایک منظم غیر قانونی نیٹ ورک ہے جسے مخصوص عناصر کی حمایت حاصل ہے، اور جب بھی ریاست ان کے خلاف کارروائی کرتی ہے تو جھوٹے بیانیے پھیلائے جاتے ہیں۔ انہوں نے نوجوانوں کو اپنے عقیدے، اسلاف اور معاشرتی اقدار کو مضبوطی سے تھامے رکھنے کی تلقین کی اور ملکی ترقی میں مثبت کردار ادا کرنے پر زور دیا۔
تفصیلات کے مطابق پاک فوج کے سربراہ جنرل عاصم منیر کے بہاولپور کے دورے کی مزید تفصیلات سامنے آئی ہیں، جہاں انہوں نے طلبہ سے ملاقات میں حالیہ دہشت گردی کے واقعات کے پیچھے چھپے حقائق سے پردہ اٹھایا۔
پاک فوج کے شعبہ تعلقات عامہ (آئی ایس پی آر) کے مطابق آرمی چیف نے کہا کہ پاکستان اللہ تعالیٰ کا دیا ہوا ایک انمول تحفہ ہے جسے بے شمار نعمتوں سے نوازا گیا ہے۔ ان کا کہنا تھا کہ ہمیں اپنے عقیدے، اسلاف اور معاشرتی اقدار کو کبھی فراموش نہیں کرنا چاہیے۔
انہوں نے مزید کہا کہ ملک کی ترقی کے لیے ہر فرد کو اپنی ذمہ داری نبھانی ہوگی۔ انہوں نے نوجوانوں کو مشورہ دیا کہ وہ بلاوجہ تنقید کرنے کے بجائے اپنی توجہ اپنی کارکردگی اور فرائض پر مرکوز رکھیں۔
جنرل عاصم منیر نے اپنے خطاب میں کہا کہ جب تک پاکستان کی عظیم مائیں اپنے بیٹے وطن پر قربان کرتی رہیں گی اور قوم بالخصوص نوجوان اپنی افواج کے ساتھ کھڑے رہیں گے، تب تک کوئی بھی ملک کو نقصان نہیں پہنچا سکتا۔
سپہ سالار نے دہشت گردی کے پس منظر میں موجود عناصر پر روشنی ڈالتے ہوئے کہا کہ دہشت گردی کے پیچھے ایک منظم غیر قانونی نیٹ ورک موجود ہے، جسے مخصوص عناصر کی پشت پناہی حاصل ہوتی ہے۔ انہوں نے واضح کیا کہ جب بھی ریاست ان عناصر کے خلاف کارروائی کرتی ہے، تو ان کے جھوٹے بیانیے گردش کرنے لگتے ہیں۔
اپنے دورۂ بہاولپور کے دوران آرمی چیف نے چھاؤنی کا بھی دورہ کیا اور وہاں جاری آپریشنل تیاریوں کا جائزہ لیا۔ آئی ایس پی آر کے مطابق جنرل عاصم منیر کو بہاولپور کور کی آپریشنل تیاریوں اور تربیتی امور پر بریفنگ دی گئی، جہاں انہوں نے فوجی جوانوں کی محنت، عزم اور جنگی تیاریوں کو سراہا۔
آرمی چیف نے کہا کہ سخت اور مؤثر تربیت ہی ایک سپاہی کی پیشہ ورانہ ترقی کی بنیاد ہے، اور جدید جنگی چیلنجز سے نمٹنے کے لیے یہی پاکستان آرمی کی سب سے بڑی طاقت ہے۔
اس موقع پر انہوں نے سی ایم ایچ انسٹی ٹیوٹ آف میڈیکل سائنسز (سی آئی ایم ایس)، انووسٹا چولستان، اور انٹیگریٹڈ کومبیٹ سمیولیٹر ارینا کا افتتاح بھی کیا۔ ان کا کہنا تھا کہ یہ جدید منصوبے طبی تعلیم، انفارمیشن ٹیکنالوجی، اور جنگی تیاریوں کو فروغ دینے کے لیے متعارف کروائے گئے ہیں۔
دورے کے دوران آرمی چیف نے بہاولپور کی مختلف جامعات کے طلبہ سے بھی ملاقات کی۔ اس موقع پر انہوں نے نوجوانوں پر زور دیا کہ وہ تعلیمی میدان میں سخت محنت کریں، اپنی مہارتوں میں اضافہ کریں اور قومی ترقی میں بھرپور کردار ادا کریں۔
قبل ازیں بہاولپور پہنچنے پر کور کمانڈر بہاولپور نے آرمی چیف کا استقبال کیا۔
