بھارت کے معروف اداکار تھلاپتی وجے نے چنئی میں ایک شاندار افطار کا اہتمام کیا، جس میں ہزاروں افراد شریک ہوئے۔ اداکار خود بھی روایتی لباس اور ٹوپی میں نظر آئے اور مسلمانوں کے ساتھ روزہ افطار کیا۔ حیران کن طور پر، عیسائی مذہب سے تعلق رکھنے والے وجے نے نماز مغرب میں بھی شرکت کی، جس کی ویڈیو تیزی سے وائرل ہو گئی۔
تفصیلات کے مطابق بھارتی فلم انڈسٹری کے مشہور اداکار تھلاپتی وجے نے رمضان المبارک کے موقع پر چنئی میں ایک بڑی افطار تقریب کا اہتمام کیا، جس میں ہزاروں افراد نے شرکت کی۔ بھارتی میڈیا رپورٹس کے مطابق، وجے نے حال ہی میں اپنی سیاسی جماعت "تامیلاگا ویٹری کازگام” تشکیل دی ہے، اور یہ افطار پارٹی بھی اسی جماعت کی جانب سے منعقد کی گئی تھی۔
اس موقع پر تھلاپتی وجے خود بھی موجود رہے اور انہوں نے مسلمانوں کے ساتھ روزہ افطار کیا۔ تقریب میں اداکار کو روایتی لباس اور ٹوپی میں دیکھا گیا، جس سے ان کی سادگی اور احترام کا اظہار ہوتا ہے۔ افطار تقریب میں قرآن پاک کی تلاوت کی گئی اور خصوصی دعائیں بھی مانگی گئیں۔
دلچسپ بات یہ ہے کہ وجے، جو کہ عیسائی مذہب سے تعلق رکھتے ہیں، مسلمانوں کے ساتھ نماز مغرب میں بھی شریک ہوئے۔ ان کی یہ ویڈیو سوشل میڈیا پر تیزی سے وائرل ہو گئی، جسے شائقین نے خوب سراہا۔
یہ بھی یاد رہے کہ تھلاپتی وجے کا شمار بھارت کے سب سے زیادہ معاوضہ لینے والے اداکاروں میں ہوتا ہے۔ انہوں نے ایک فلم کے لیے 275 کروڑ بھارتی روپے کا معاوضہ حاصل کیا، جو کہ ان کی زبردست مقبولیت اور کامیابی کو ظاہر کرتا ہے۔
