سڈنی:آسٹریلیا کے سابق کرکٹر اسٹیورٹ میک گل پر منشیات اسمگلنگ میں ملوث ہونے کا الزام ثابت ہوگیا ہے۔ عدالت نے انہیں اپنے بہنوئی اور ایک ڈیلر کے درمیان کوکین کے سودے میں سہولت کاری کا قصور وار قرار دیا ہے، تاہم انہیں منشیات کی فراہمی کے الزام سے بری کر دیا گیا۔
آسٹریلوی میڈیا کے مطابق ڈسٹرکٹ کورٹ میں منشیات اسمگلنگ کے مقدمے کی آٹھ روزہ سماعت کے بعد جمعرات کو فیصلہ سنا دیا گیا۔ عدالت نے قرار دیا کہ سابق انٹرنیشنل کرکٹر اسٹیورٹ میک گل اپنے بہنوئی مارینو سوتیروپولوس اور ایک ڈیلر کے درمیان کوکین کے سودے میں ملوث پائے گئے ہیں۔ تاہم میک گل کو ممنوعہ ادویات فراہم کرنے کے الزامات سے بری کر دیا گیا۔
سماعت کے دوران عدالت کو بتایا گیا کہ اپریل 2021 میں میک گل نے اپنے بہنوئی اور ڈیلر کے ساتھ مل کر نیوٹرل بے کے ایک ریسٹورنٹ میں ملاقات کا اہتمام کیا اور اس میں شرکت کی۔ اس ملاقات میں ایک کلوگرام کوکین کے بدلے 3 لاکھ 30 ہزار ڈالر دینے پر اتفاق ہوا تھا۔
دلچسپ بات یہ ہے کہ میک گل کو کبھی منشیات کے ساتھ نہیں دیکھا گیا اور نہ ہی ان کے قبضے سے کوئی رقم برآمد ہوئی، لیکن عدالت نے انہیں اس سودے میں سہولت فراہم کرنے کا مرتکب قرار دیا ہے۔
آسٹریلوی میڈیا کا کہنا ہے کہ میک گل کو رواں برس کے آخر میں سزا سنائی جائے گی۔
اسٹیورٹ میک گل نے اپنا بین الاقوامی کرکٹ کیریئر لیجنڈری اسپنر شین وارن کے ساتھ شروع کیا۔ انہوں نے 1998 سے 2008 کے دوران آسٹریلیا کی جانب سے 44 ٹیسٹ میچ کھیلے۔ انہیں زیادہ تر مواقع شین وارن کی غیر موجودگی میں ملے۔ اپنے کیریئر کے دوران، انہوں نے 29.02 کی اوسط اور 54.02 کے اسٹرائیک ریٹ کے ساتھ 208 وکٹیں حاصل کیں۔
